Alubad. 5 - Fanawbuid tagsibaliwas Fakayabian

Alubad 5 Darangin laman Yawi Gdiri

Laman sa tagfangguna alubad: Dabid at alubad. Gasfuan nu gtulali.

¹ Yawi, get au sa emu te, dungugi ku darangin gina au e fagidapun.

² Ku Fun Dius, aroro sa way lang emu nu gdarangin au, dungugi nu get au gubuk sa emu.

³ Kayu balabag sirut, gfadasug au ku ngay fagetun sam daga salubangan, ay gfanya au am famalus. Dungugi angku gina menit kasure.

⁴ Dius, wo kaylat at mauri fag fakamulun, ay at mauri fag ngay taw wa manangalo emu.

⁵ Takamatungudun wa manangakbang sam daga salubangan, ay kauri o fagayu tagfakamulun at mauri.

⁶ Gfamin ban o fagayu takamuag. Ay kauri yangay o anggan takamabul ay tagfandaya fag ngay taw.

⁷ Dewa katanya, siginan am kamafangesugan, mananakbo ktua sam bale fakafulan laman kamababaun au nanseg emu.

⁸ Yawi, ngayu ku fawayan, nu katanya, tabani angku laman mafafaning ktua am fakaylatun. Ay gubuki angku laman lumao au sam dalan.

⁹ Ku ngay fawayan at ngay nalong wa mafanud, ay kabavn at fagamatanganun tagfauri way at ngay iba. Ay at ngay longan malimu kata sik fagfolian nu maluangan, ay at ngay algan gfalingun way at iba.

¹⁰ Ku Dius, fasafuli sanya fag ngay taw te, e asalanan. Kanya nangus fagayu umsangdaw sat nawat fag ngay sangdaw. Aiyani wan anya fagayu siginan am daga salubangan, aroro maksvn wan nu gasalanan ay nu kamabo.

¹¹ Dewa katanya, guseganan tua nangus fagayu tagseg emu. Ay kabavn galubad tua guseganan. Dirii fagayu takesug emu laman kanya fagayu guseganan maksvn.

¹² Nafamanyun o sat ngay matuyan, ay siginan am fakesugun galaga o kanya fagayu, kata sik famalabag.