Alubad. 48 - Fanawbuid tagsibaliwas Fakayabian

Alubad 48 Siun, Dius at Furuan

Kura at ngay kasugfunanan at alubad.

¹ Yawi mabalyanan; masine nu gfauseganan tam anya sit furuan, sat yud e malong fag buksul.

² Kafag buksul ngabat ay masine, ay gfae fagusegananun sas fagdaul daga. Siun yud e malong fag buksul at mabalyanan fag Fun at furuan.

³ Dius gfaogat Erusalem at ngay alad, laman gfalag te, gulit.

⁴ Tibak talun at ngay fun anful laman namawayan Erusalem.

⁵ Ay kanya fagayu nu nalag Erusalem, anlimu maksvn ay nalagyu.

⁶ Kanya fagayu gtadtaruyan kalimu, kata sik mangena tagidapan nu gfasalug.

⁷ Dius nafabul kanya fag ngay tagfawayan, kata fulug nu giklas at ngay sakayan lino tagbia.

⁸ Ebi nadungug yay lang mi Yawi at Mabalyanan at nafakamulun, ay katsi nalag wami at nafakamulun sat furuan. Ay kabavn Dius gfasik mogat kanya fag furuan.

⁹ Dius, gina ami sim bale gamatangan ami sabaliwa nu mafangesug o.

¹⁰ Ay fagayu taw sas fagdaul daga gfauseganan emu, aroro siginan am fagmasineun. Siginan am fagmabalyananun, gfakamulun tuo gugat at matuyan.

¹¹ Sis Buksul Siun ay sis Uda fag ngay furuan at ngay taw guseganan, aroro matuyan tua am ngay balyawvtan.

¹² Afagdauli sas furuan Siun ay tapi at fagulitan fag ngay bale ngabat.

¹³ Ay lingamani fia at ngay alad ay at ngay bale mogat, laman ban e fagmafoyungun am sat fadogan fag ngay kasugfunanan te,

¹⁴ “Dius wan tam Dius kabavn ban; kanya ban gufud tua gugat antam.”