Alubad. 45 - Fanawbuid tagsibaliwas Fakayabian

Alubad 45 Fun nu Kadadwa

Laman sa tagfangguna alubad: Nu karuri kata “Barugwak.” Kura at ngay kasugfunanan at nariruk. Sik alubad laman sas fakadadwaun.

¹ Ku fagnanlongun sas fun at masine tua fag ngay longan tagsi ku amatanganan. Mafalong ktua at masine kata sik taw tagsaful fia gfaturunan nu garingang.

² Mesug fag fun, o wan at maseganama sas fagayu mangama. Am ngay longan e fanggubukun tua sat nadungug. Ay kabavn Dius ggubuk tua gugat emu.

³ Taudani am fiso sim fagwan, aroro o wan at maseganama fag tagfawayan. Ay o wan at mabalyanan ay at mauseganan fag fun!

⁴ Fasurei wan am fagmabalyananun! Mababo tuo e fagmatuyanun, e fakamababaunun ay e fagmatuyanun. Ay fasurei nusnge wain at madulo siginan am fagmabalyananun.

⁵ Maruk am ngay banyas, ay kataruk sam ngay fawayan at baga. Ngay talun at taw grungan sam salubangan.

⁶ At mabalyanan, nu gfagtainan o, we fakatabuan, ay matuyan tua nu gfunan o.

⁷ Kesug tuo fagmatuyanun, ay kauri o at mauri. Nu katanya, Dius nafili emu, ay nafon emu at mauseganan, gtungud tua sam ngay iba.

⁸ Nafatayuk sam ngay lanbung tuluk famaebebanglu tagsaman. Am bale daul masulo ay masine, ay sanya e gfawang fagfawangun laman gfasun emu.

⁹ Tagsim bale fag ngay mangena, tibak talun at fun at ngay baguina. Am fabubayan malindug sibaliwa am siun, ay e ngay famasine sit ngay afud bilug mawatan siginans gintu tagsiginans Ufir.

¹⁰ Fun at fabubayan, dungugani ku longan emu: alyami yap am ngay kalongan ay am ngay fasabale.

¹¹ Fun naylat emu aroro masine o. Kanya ban am fun, ay suyui ban gugat anya.

¹² Ngay taw Tiru namuba sa emu ngay fanggalangun, ay anggan at ngay maramraman sa wa emu nu get gubuk.

¹³ Masine tua fun at fabubayan, ay masakboan sit sadili fagtiugan. Ay at lanbung mafasinean siginans gintu.

¹⁴ Ay gina galanbungan takatanya, e gtabanan anya sas fun, gadgaloan ngay mangena taggubuk anya.

¹⁵ Kanya fagayu guseganan gsakbo sas fun at bale daul.

¹⁶ Mesug fag fun, am ngay baguama ban umsik ngay fun yangay kata emu, ay aroro siginan emu, kanya ban fagayu nanfunan sas fagdaul daga.

¹⁷ Gfamatang kban sas fagayu kasugfunanan sabaliwa emu. Nu katanya, ngay taw ban sas fagayu talun gfauseganan emu kabavn ban.