Alubad. 41 - Fanawbuid tagsibaliwas Fakayabian

Alubad 41 At ke Fakasaitun fag Taw at Darangin

Dabid at alubad laman sas tagfangguna alubad.

¹ Mauseganan sik taw nu ggubuk tua ngay taw at yud e kwa. Nu nke fagidapun, Yawi ggubuk yangay anya.

² Yawi galaga ay gdiri anya, ay gfon anya nusnge wain, ay di gfababawan anya sat ngay fawayan.

³ Yawi ggubuk ay gfafia kafag taw at ke fakasaitun.

⁴ Nalong au sas Yawi te, “Afanyui ay fafiai angku, aroro anke asalanan au sa emu.”

⁵ Ku ngay fawayan gfalingun angku te, “Seduge ya ban nu kabul au laman umkalyam kwan?”

⁶ Ay gina kanya fagayu nansibo angku, gfalagan way lang. Ay aroro mangaro wa matuyan. Ay kanya fagayu nu nalo wan, namadungug sa tibak taw at nafanlonganan mauri sabaliwa angku.

⁷ Ay fagayu takauri angku, kabavn kasulup gugat te, mauri kway, ay ginasan gugat gkamatoan te,

⁸ “Maksvn wan kanya at fakasaitun, wa ban kafia ya.”

⁹ Ay dewa ku fagadgalangan fia ay tagfasfuan angku gfangon ay ku fagananadun gugat, ankuri ay natalyuyan wa angku.

¹⁰ Yawi, afanyui ay fafiai angku laman ban manamasud au ku ngay fawayan.

¹¹ Nasaful kwa te, kaylat tuo angku, aroro ku ngay fawayan wa mababo angku.

¹² Kdi gfakamulun mauri. Nu katanya, ggubuk tuo angku ay kabavn si ktua gugat sim akbang.

¹³ Kabavn segi Yawi, taw Israel at Dius. Anud!