Alubad. 40 - Fanawbuid tagsibaliwas Fakayabian

Alubad 40 Sik Alubad laman Gfauseganan Yawi

Laman sa tagfangguna alubad: Dabid at alubad.

¹ Nagwantan au nafanya Yawi, ay kanya nasalubang angku ay nabalus tua ku fagetun.

² Kata nu si au sik bubun at malifak, kanya nalakwi tua angku ay nafalindug sa sik tungud gang daul, nu katanya anke fagmanabayanun ktua.

³ Ay kanya nafoyung angku sik bagu fag alubad laman famauseganan anya. Ngay taw nu nalag takatanya, gsuyu ay gafanud sas Yawi.

⁴ Mauseganan sik taw nu gafanud tua sas Yawi, ay nu ddi nangakbang ya sa sangay takamatungudun, ay nu ddi gfaning tibak taw tagseg at yud matuyan fag ngay fagsegan.

⁵ Yawi, ku Dius, we mafasud emu. Ngayu am nafakamulun at madulo laman sa emi, ay ngayu yangay am ngay algan sa emi at masine. Ay nung kway ro nanlong, kwa mafatap ya.

⁶ Wo guseganan nusnga setaw fag fanggalangun. Ay wo naet nusnga setaw fag fagirugun fag fanggalangun, ay fanggalangun famalyam asalanan, bundi mangaro tuy fagayu am fagetun. Nu bunway nagubuk o angku laman gtogdungug au am longan.

⁷ Nu katanya, nalong au te, “Ste au. Ay anriruk sim fafil sabaliwa angku.”

⁸ Dius, kaylat au gfaning am fakaylatun. Ay gfasi ktua gugat ku amatanganan am ngay suguan.

⁹ Nafoyung au sam ngay taw am fagmatuyanun. Yawi, saful way o te, kwa gfaragang nu gfoyung au takatatuy.

¹⁰ Ay nafoyung ktua sas fagayu taw sabaliwa nu gfalangfe o angku. Ay nafoyung kyangay te, matuyan tua nu gfalangfe o. Ay kwa gfaragang gfoyung sabaliwa nu mafangesug o ay nu matuyan o sim ngay taw at fagmafulan.

¹¹ Yawi, afanyui tua gugat angku aroro matuyan tuo, ay dirii gugat angku aroro mafangesug tuo.

¹² Kwa mafatap ku ngay fagidapun; Ku ngay fagidapun maligung angku kata ku ngay asalanan gsuklub angku. Nu katanya, kwa glag ya. Ay ku ngay asalanan ayu yap tua ku buk. Nu katanya, arvs kwe fagsegun ya.

¹³ Yawi, gfainfanyuan au get sa emu te, falangfei ay masakiti gubuki angku.

¹⁴ Ngay taw nangus tagyafabulun ay takauri angku at ngay algan takatanya umragang ay umkalyam wan.

¹⁵ Ngay taw nangus tagfalingun angku, umke fakaplaun.

¹⁶ Ay dewa katanya, fagayu nangus takakbang sa emu, guseganan tua aroro sa emu. Ay fagayu takaylat am famalangfe, guro tua nangus gugat te, “Dius mabalyanan tua!”

¹⁷ Ku Fun, aroro sik yud kway e kwa, ay sik tagayudan, amatangi tua nangus gugat angku. O wan ku taggubuk, ay o yangay ku tagfalangfe. Ku Dius, katsi gubuki wa angku.