Alubad. 39 - Fanawbuid tagsibaliwas Fakayabian

Alubad 39 Sik taw Tagidapan nu Gfoyung at Asalanan

Laman sas Edutun, tagfangguna alubad: Dabid at alubad.

¹ Nalong au sa ku sadili te, “Nangugatan au nandiri ku ugali, ay nangagwanta au laman di au glong at mauri. Ay kwa garingang gina au munakbang sit mauri fag ngay taw.”

² Nu katanya, namaragangan kway lang, ay kwa naringang ya dewa at masine, ay ankugat way nu gidapan au sa ku amatanganan.

³ Maksvn nu gafanawa au. Ay gamatangan au gugat, kaugat way nu gidapan au gamatangan. Nu katanya, nalong au te,

⁴ “Yawi, famatangi angku te, ku leleg e fakatabuan way, ay ku ngay menit katap way lang. Foyungi nangus angku te, ku leleg gakafusun wan.

⁵ Am nafon angku fag leleg wa ngaduge. Nu sa emu kata way sik buknga sirut, ay kata way sik tagmara nu gdalan,

⁶ ay kata yangay sik aninu masakit kalyam. Ay gugatan way sas nusnge wain at yud e tungkul. Kanya gfungsu way at ngay ramraman, dewa katanya, nu nbul ban wa saful te, sinu ban at nangagbilug.

⁷ Dius, dada ya ro nu kakbang au? Nu gafanud au sa way lang emu.

⁸ Falangfei angku siginan ku fakamaboun, ay lag o kaylat ngay taw at yud e fagsafulun nu gfalingun angku.

⁹ Gragangan kway lang, kwa garingang ya, aroro ku fagidapun am naylatan wan.

¹⁰ Faragangi wan nu gfaurianan o angku. Aroro nafalang o angku ay gakabulun kwan.

¹¹ Nu gfoyung o sa sangay taw at ngay asalanan, gfamin o at ngay fagagbilugun kata ngay fatung nu gfamin. Em leleg kata way sik lalab nu gdalan.

¹² Yawi, dungugi ku darangin nu get au sa emu gubuk. Faemasuadi ku nawayway. Aroro kaduge au stes fagdaul daga sik betaw kway, ay kalyam kway ban kata ku ngay mangaguyang.

¹³ Faragangi wan nu kadotama o angku, laman ban batang kyay guseganan, gina au gakabulun.”