Alubad. 37 - Fanawbuid tagsibaliwas Fakayabian

Alubad 37 At Mauri ay at Masine fag Taw Mesa e Fakadasugan

Dabid at alubad

¹ Lag o galabian ngay taw tagfakamulun at mauri, ay lag o gafanawa anya fagayu.

² Aroro kanya fag ngay taw kata way sik makmak at masakit kagong, ay kata sik tanum at melo tagfangalangke.

³ Afanudi sas Yawi, ay fakamuluni at masine. Ay gbanwan ban o manabayan iste fag talun.

⁴ Useganani sas Yawi, ay kanya gfon emu am fakaylatun.

⁵ Fatigwanani wan sas Yawi fagdaul am leleg, ay afanudi sa anya, ay kanya ggubuk emu.

⁶ Ay kanya namasaful fia sas fagayu taw te, matuyan o. Ay am balyawvtan kata menit nu masulo, gina swabilug menit.

⁷ Manabayani tua sis Yawi at daga salubangan, ay agwantai tua fanyai at fagnamakamulunun. Lag o galabian at mauri fag ngay taw dewa manabayan nu gbanwan, siginan at mauri fag balyawvtan.

⁸ Lag o gfangauri, ay lag o gfangafanluat, ay lag o gafanawa, aroro takatanya gfae fagmauriun way emu.

⁹ Yawi gaiyan at mauri fag ngay taw, dewa katanya, fagayu tagafanud sa anya gbanwan tua ban gugat ste fag talun.

¹⁰ Wa glugo ya, ay at mauri fag ngay taw umkalyam wan. Ay dewa ban o grvbvy wo lumag ya anya.

¹¹ Dewa katanya, ngay taw ban takamababaun gbanwan tua gugat manabayan sis talun Israel ay e kwa tua nusnge wain.

¹² At mauri fag ngay taw at algan gfauri gugat at matuyan fag ngay taw, ay gfalag at dotama sa anya fagayu.

¹³ Dewa katanya, tam Fun kase way takatanya fag ngay taw, aroro kanya saful way te, munakbang wan kanya fag ngay taw nu gafaurianan.

¹⁴ At mauri fag ngay taw ggunut at mesa fiso, ay gfatiuan at ngay godun laman namabul at yud e kwa fag ngay taw tagugali at matuyan.

¹⁵ Dewa katanya, at ngay sadili way at naurus, ay at ngay banyas umlifung.

¹⁶ At matuyan fag taw at ramraman, dewa alay way, amasine yap tua sa sik taw tangayu at ramraman tagsiginan ways fagmauriun;

¹⁷ aroro Yawi ggubuk tua ngay taw at matuyan, dewa katanya, at mauri fag taw at fagmakatuun umragang wan.

¹⁸ Kayu menit, Yawi gagbilug tua at matuyan fag ngay taw, ay kanya ban fagayu mul sik famonun at yud katabu.

¹⁹ Kanya fagayu dewa anke fagidapun, di kapla, ay dewa andasug fanlunus, kasakan tua gugat.

²⁰ Dewa katanya, at mauri fag ngay taw umbul. Yawi at ngay fawayan umkalyam yangay ban kata barugwak, ay kata sik anus nu kalyam.

²¹ At mauri fag ngay taw mafanbedan ay wa gbayad ya, dewa katanya, at matuyan fag ngay taw e fakafanyun tua, ay kamon tua sat ngay iba.

²² Yawi at faggubukun fag ngay taw gbanwan tua gugat sis talun Israel. Dewa katanya, kanya gaiyan wan at nafauri fag ngay taw.

²³ Yawi gufud tua sik taw tagugali at matuyan.

²⁴ Yawi gbakvd tua kanya fag taw, ay dewa antaid, di kalub.

²⁵ Siginan nu masisian au dasug katsi, kya batang glag Yawi nu gfabayan at matuyan fag ngay taw, ay at ngay sisian nu gfangetan.

²⁶ At matuyan fag taw kabavn kamon tua ay kamaulbus, ay at ngay sisian sik fagulitan tua.

²⁷ Ubuni at mauri, ay fakamuluni at matuyan, laman kabavn gbanwan tuo sis talun Israel.

²⁸ Yawi kaylat fagmatuyanun, ay di gfabayan ngay taw at matuyan sa anya. Dewa katanya, at mauri fag ngay taw at sugfun umkalyam wan.

²⁹ Ay at matuyan fag ngay taw gagbilug tua ban gugat talun Israel, ay gbanwan sanya kabavn.

³⁰ At matuyan fag taw at aringang sa tua gugat baliwa sfagsafulun, ay at longan matuyan tua.

³¹ Ay kanya gamatang tua Dius at ngay suguan, ay di gsaruy.

³² Kabavn ngay taw mauri gulit gugat at matuyan fag ngay taw, laman nandaya ay namabul.

³³ Dewa katanya, Yawi di gfabayan at matuyan fag ngay taw sat ngay fawayan. Ay gina e ginsaful sabaliwa at nafakamulun, kanya fagayu di gafaurianan.

³⁴ Afanudi sas Yawi, ay laoi sat dalan. Nu katanya tua, kanya guseganan tua ay gfabanwan ayu sas talun Israel. Ay lumag ban am nu gaiyan ngay taw mauri sanya ginan fag talun.

³⁵ Nalag au sik taw mauri nu kamalingun. Kanya kamatungudun, kata sik tangabat fag fun kayu sis buksul Lebanun.

³⁶ Gina au gdog nanlag anya, kwe lagan ya, ay dewa au grvbvy, kwa nalag.

³⁷ Damai at matuyan fag taw. Kanya ban manabayan tua nu gbanwan.

³⁸ Dewa katanya, fagayu taw takamabo kamin wan, ay kanya ban fagayu we fagsegun ya.

³⁹ Yawi wan tagfalangfe at matuyan fag ngay taw. Ay kanya yangay kanya fag ngay taw at fagsarirungan gina e fagidapun.

⁴⁰ Yawi ggubuk tua ay gfalangfe, kanya fag ngay taw siginan ngay taw mauri, aroro kanya fagayu gsarirung tua sa anya.