Alubad. 34 - Fanawbuid tagsibaliwas Fakayabian

Alubad 34 Dius at Fakafanyun

Dabid at nariruk gina gfalagan te, we amatanganan ya ay fun Abimelek gaiyan anya.

¹ Kabavn, gseg au Yawi. Ay kwa gfaragang nu gseg au anya.

² Gfanagsag au Yawi at nafakamulun, ay tagafalingunan fag ngay taw dumungug ay guseganan.

³ Gewan, gfauseganan tam Yawi, ay gfabat tam at ngayan.

⁴ Nadarangin au sas Yawi, ay nabalus tua angku. Ay nafalangfe angku siginan ku ngay fakalimuun.

⁵ Fagayu tagafanud sas Yawi, masulo at ngay kamatan nu guseganan, ay kabavn di e fakaplaun.

⁶ Gina au yud e fagsegun ya, nadarangin au sas Yawi, ay kanya nabalus tua ay nafalangfe angku siginan ku fagidapun.

⁷ Yawi at tagbarita gulit tua fagayu takamababaun sas Yawi, ay gfalangfe tua siginans fagidapun.

⁸ Faskudi ay lumag am te, Yawi matuyan tua. Mauseganan sik taw nu nansarirung tua gugat sa anya!

⁹ Yawi at nafili fag ngay taw, suyui tua anya, aroro kanya gfon nusnge wain sas fagayu tagsuyu anya.

¹⁰ Dewa at mabitsug fag ngay liun tibaginan kalunus way, dewa katanya, fagayu taw tagafanud tua sas Yawi di gakurangan nusnge wain at masine.

¹¹ Ku ngay sisian, akbangi sa angku ay dungugani, gfoyung au ayu nu setain nu gsuyu am Yawi.

¹² Nusnga sinu takaylat at manabayan ay tangaduge fag leleg,

¹³ lag glong at mauri ay lag kamuag.

¹⁴ Ayayui siginans fagmauriun, ay fakamuluni at masine. Ay ugatani rvbvyi fagmanabayanun.

¹⁵ Yawi gulit tua ngay taw at matuyan ay gdungug tua at ngay darangin.

¹⁶ Dewa katanya, Yawi gfawayan fagayu tagfakamulun mauri. Ay gfabul wan kafag ngay taw laman at ngay ngayan wa kamatang ya, ay umkalyam wan siginans fagdaul daga.

¹⁷ Yawi gdungugan tua at matuyan fag ngay taw at darangin, ay gfalangfe tua siginan at ngay fagidapun.

¹⁸ Yawi munakbang tua sa sangay taw at kinmomuy at amatanganan, ay gfalangfe tua at yud e fagsegun ya.

¹⁹ At matuyan fag ngay taw ngayu at fagidapun, dewa katanya, Yawi gfalangfe tua anya fagayu siginan at ngay fagidapun.

²⁰ Yawi galaga anya fagayu, ay nusdi sadi at bini di e kagatvng.

²¹ At mauri fag ngay taw umbul sat sadili fagmauriun. Ay fagayu taw at yud kaylat at matuyan, umfaurianan.

²² Dewa katanya, Yawi gfalangfe tua at ngay fagsuguan, ay nusdi sadi di e gafaurianan tagsarirung si anya.