Alubad. 32 - Fanawbuid tagsibaliwas Fakayabian

Alubad 32 Nu Gfoyung tua Tam Tam Asalanan, Dius Gfalyam

Dabid at Alubad.

¹ Mauseganan sik taw, at asalanan nu nalyam tua, aroro Yawi nafalyam wan.

² Mauseganan sik taw, Yawi nu ddi gamatang ya at ngay asalanan, ay nu ddi gfandaya ya sat amatanganan.

³ Gina au yud nafoyung ku ngay asalanan, gfandeng au gugat fagngabak menit, ay ku bilug kalukme.

⁴ Maksvn nu gfaidapan o angku kayu menit ay yabi, ay ku fagmabitsugun gakaminun wan, kata sik mamam tagakalanggangun wan gina mangune.

⁵ Yawi, nafoyung au sa emu ku ngay asalanan, ay dakdi nasuksuk. Anud nalong au sa ku sadili te, “Namoyung au sa emu ku ngay asalanan.” Ay nafalyam tuo.

⁶ Nu katanya, fagayu taw at matuyan masine nu gdarangin sa emu kaduge e buknga, laman dewa faurianan andasug kata sik lugwak, kanya fagayu di kafaurianan.

⁷ O wan ku fagsuksuanan; gdiri tuo angku sis buknga fagidapun. Ay nafoyung o sa angku ngay alubad sabaliwa nu gfalangfe o.

⁸ Yawi nalong sa angku te, “Gfoyung au sa emu at masine fag dalan am fagnanloan, ay gfalu kban emu gina au gulit emu.

⁹ Lag gugali kata sik kabayu at ugali, aroro kanya ya gfaning yakmay e nasiuk at dungus.”

¹⁰ At mauri fag ngay taw umke ngay fagidapun. Dewa katanya, Yawi gulit tua gugat ngay taw tagafanud sa anya aroro kanya mafangesug.

¹¹ Am at matuyan fag ngay taw, useganani sas Yawi! Am, tagugali at matuyan, uroi useganani!