Alubad. 31 - Fanawbuid tagsibaliwas Fakayabian

Alubad 31 At ke Fagafanudun fag Darangin

Dabid at alubad. Laman sas tagfangguna alubad.

¹ Yawi, o wan ku fagnangakbangan ay ku fagnansarigan. Lag gfabayan ay gfapla angku. Falangfei angku aroro matuyan tuo.

² Dungugi ay falangfei vtv angku. Aroro o wan ku tagfalangfe ay ku fagsarigan takata sik gang at mogat.

³ O wan ku fagnanuksuanan. Nu katanya, tabanani ay ufudi angku, laman kabavn gfauseganan ktua emu.

⁴ Fayayui angku siginan ku ngay fawayan at sangdaw, aroro o wan ku fagsarigan.

⁵ Yawi, ku Dius, nafatigwanan kwan sa emu ku sadili. Falangfei angku, aroro kabavn am ngay longan matuyan tua.

⁶ Yawi, gafanud au sa emu. Nu katanya, maksvn nu kauri au ngay taw tagseg at yud e tungkul fag ngay fagsegan.

⁷ Guseganan au sa emu, aroro mafangesug o, ay glag tuo nu gidapan au, ay nasaful o ku ngay fagagwantanun.

⁸ Di o nafababawan angku sa ku ngay fawayan, nu bunway nafalangfe tuo angku siginans faurianan.

⁹ Yawi, gubuki angku aroro maksvn nu gidapan au. Ku ngay mata anbuksul ku nawayway, ay ku bilug anlukme.

¹⁰ Ngayu ku ngay fagidapun. Gwayway au gugat ay kabalu. Nu katanya, ku leleg gakafusun wan. At kaksvnan nu momuy au, ku ngay bini kata nu nrufa.

¹¹ Ku ngay fawayan ay ku ngay fasabale gfalingun angku. Ay ku ngay fagadgalangan anggan ku fagtoglagun fag ngay taw gsaruyan wan angku.

¹² Kanya fagayu wa gamatang ya angku, kata kwa sik mabulan, ay kata kyangay sik fagsuadan at marufan wan.

¹³ Nadungug au ngayuk taw taginasan sabaliwa angku. Nu katanya, kwa malao ya nusnga nday, aroro kanya fagayu gafabulun angku.

¹⁴ Yawi, dewa katanya, gafanud ktua gugat sa emu; glong au te, “O wan ku Dius.”

¹⁵ O wan tagbakvd ku leleg at sawad. Falangfei angku siginan ku ngay fawayan tagfafalo angku.

¹⁶ Falagi te, mafangesug o sa angku, am fagsuguan. Falangfei angku aroro mafangafanyu o.

¹⁷ Yawi, gfainfanyuan au sa emu te, lag gfabayan nu gafaplan au. Dewa katanya, at mauri nangus fag ngay taw umkapla wan, ay kanya fagayu glao sat manabayan fag fagfolian.

¹⁸ Faragangi wan ngay taw at fakamuagun ay at fakamatungudunun. Aroro kanya fagayu gfalingun gugat at matuyan fag ngay taw.

¹⁹ Kasakan tua am nafalganan fag ngay fagmasineun sas fagayu taw tagsuyu emu, ay sas fagdaul daga at ngay taw nalag.

²⁰ Nasuksuk o am ngay taw sam fagmasineun, siginans ngay taw mauri at algan ay at longan.

²¹ Fauseganani Yawi! Aroro kanya nafalag sa angku te, mafangesug siginan at ngay fakamulun at madulo, ay nadiri angku gina au si sik furuan at maligung at ngay fawayan.

²² Gina au e fakalimuun, gamatangan au te, “Nafabayan wo angku.” Dewa katanya, nadungug tuo ku fagetun, ay nagubuk tuo angku.

²³ Am fag ngay taw at matuyan sas Yawi, esugi anya. Aroro kanya gdiri tua at matuyan fag ngay taw. Dewa katanya, kanya gfaurianan ngay taw takamatungudun kata at ngay nafakamulun.

²⁴ Am fag ngay taw tagafanud sas Yawi, faksvni ay fabitsugi ay amatanganan.