Alubad. 30 - Fanawbuid tagsibaliwas Fakayabian

Alubad 30 Fagusegananun fag Darangin

Dabid at nariruk; sik alubad gina gfadante Yawi at bale.

¹ Yawi, gfauseganan au emu, aroro nafalangfe tuo angku siginan sangay faurianan. Ay di o naylat ku ngay fawayan nu gfalingun angku sa takatatuy ku kayaunanan.

² Yawi, ku Dius, naet au sa emu gubuk. Ay nafafia tuo angku.

³ Nafalangfe o angku siginans fakabulun. Gina au glao sas fagfolian, nafasaruyan tuo angku.

⁴ Ngay taw at matuyan, alubadi sas Yawi ay segi at ngayan.

⁵ Aroro kanya dewa ndotama wa glugo, ay di e fakatabuan at fagmasineun sat nafili fag ngay taw. Ay sisad yabi dewa e gwayway, balabag di manabayan tua.

⁶ Gina au manabayan, glong au te, “Wa ban e kadasug ya sa angku at mauri.”

⁷ Yawi gina o kesug angku, gdiri tuo angku, ay kata ktua at mogat fag buksul. Ay dewa katanya, gina o natalyuyan angku, anmomuy au.

⁸ Yawi, nadarangin au sa emu laman get gubuk:

⁹ “Nataw ya ban ku fanambagun sa emu nu nbul kwan? O nunda at ngay kinbul mafauseganan yay emu? O ay mafoyung yay am fagmatuyanun?

¹⁰ Yawi, dungugi ay afanyui angku! Gubuki angku!”

¹¹ Nafalyam tuo ku fakabaluun, ay natubus o sik fagusegananun. Nu katanya, gfauigan au ku bilug. Dewa maksvn ku fakabaluun, nafasun tuo angku, ay nafae lanbung tuo angku sik fagusegananun.

¹² Nu katanya, kabavn galubad au ay gfauseganan emu. Yawi, ku Dius, kabavn gfauseganan au emu.