Alubad. 28 - Fanawbuid tagsibaliwas Fakayabian

Alubad 28 Darangin laman Get Gubuk

Dabid at nariruk

¹ Yawi, o wan ku fagsarigan fag gang at mogat. Guro au emu; dungugi ku darangin! Aroro way ro wo gbalus ya angku, umkata au sik kinbul sis fagfolian.

² Dungugi nu get au sa emu gubuk, kaduge au gfabat ku ngay take sit Mafasamanan Fia fag Suluk sim bale.

³ Lag o gfaurianan angku gasfuan at mauri fag ngay taw. Kanya fagayu masine at aringang, dewa katanya, mauri way at ngay algan.

⁴ Fakamuluni sa anya fagayu kata at ngay nafakamulun. Faurianani anya fagayu kaksvn at nafakamulun fag ngay fagmauriun.

⁵ Kanya fagayu nafayud e tungkul am ngay nafakamulun. Gfaurianan ban o anya fagayu kata nu giklas sik bale, ay wa ban o gdog ya nangawat.

⁶ Yawi, gfauseganan au emu aroro nabalus tuo ku fagetun.

⁷ Gfabitsug tuo ay gdiri angku. Gafanud au sa emu sas fagdaul ku amatanganan. Nu katanya, galubad au gfauseganan emu.

⁸ Yawi, gfabitsug tuo am ngay taw. O wan sik fagsarigan, am nafili fag fun at fagnansarigan, laman kanya di e fakalimuun ya.

⁹ Falangfei ay fadantei am ngay taw. Ay kabavn ban alagai anya fagayu, kata sik tagalaga tupa nu gulit ay nu gbuba at ngay tupa.