Alubad. 27 - Fanawbuid tagsibaliwas Fakayabian

Alubad 27 Ke Fagafanudun at Darangin

Dabid at nariruk

¹ Yawi, o wan ku salung ay ku tagfalangfe. O wan ku taggubuk. Sinu ya ku fakalimuun? Nu katanya, kwe fakalimuun ya.

² Ngay tagfakamulun at mauri nu nanamawayan angku laman namabul, kanya way fagayu tagababawan angku.

³ Kwa kalimu ku ngay fawayan, dewa maligung angku. Ay dewa au sis awayan, gafanud ktua sa emu.

⁴ Yawi, get au sa emu te, kaduge kban gleleg aylati nu namanwan au sa emu, laman lumag au fia am fagmasineun, ay gamatangan ktua fia sa emu.

⁵ Sis buknga fagidapun, o way lang ku fagnansarigan, gfasuksuan tuo angku sam bale, ay gtabanan o angku sa sik tungud fungsu.

⁶ Nu katanya, gbabo ktua ku ngay fawayan si ku ligung. Ay gina au gfon fanggalangun sis Yawi at bale, guro au guseganan ay galubad au gfauseganan anya.

⁷ Yawi, dungugi nu guro au. Afanyui angku ay balusi ku darangin.

⁸ Yawi, nalong o te, “Rvbvyi angku,” nu katanya sa ku amatanganan grvbvy au gugat emu.

⁹ Lag gsuksuan angku! Lag kadotama ay gaiyan angku, am fagsuguan. Ay gubuki tua gugat angku. Ku Dius, lag gfabayan ay gubun angku, aroro o wan ku tagfalangfe.

¹⁰ Yawi, dewa ban ku mina ay ku mama naubun angku, galaga tuo gugat angku.

¹¹ Yawi, foyungi angku at matuyan fag ugali. Tabanani angku sat matuyan fag dalan at yud e malimu, aroro ngayu ku fawayan.

¹² Lag o gfababawan angku sa ku ngay fawayan, aroro kanya fagayu kamuagan glong te, mauri au, laman namaurianan angku.

¹³ Yawi, gafanud ktua te, kaduge kban gleleg stes fagdaul daga, lumag au am fagmatuyanun.

¹⁴ Afanudi sas Yawi! Faksvni ay amatanganan, ay dangay kamomuy. Afanudi tua sa anya!