Alubad. 26 - Fanawbuid tagsibaliwas Fakayabian

Alubad 26 At Matuyan fag Taw at Darangin

Dabid at nariruk

¹ Yawi, fatuyani te, kdi e asalanan, aroro gugali ktua sat matuyan, ay maksvn nu gafanud au sa emu ay kwa gawabilugan ya.

² Yawi insafuli ku amatanganan ay ku algan.

³ Aroro gamatang ktua gugat nu mafangesug o, ay gugali ktua at matuyan.

⁴ Kwa galo ngay taw takamuagan ay takamatungudun.

⁵ Kauri kway ngay taw mauri nu nangkamatoan, ay kwa nangalo kanya fagayu.

⁶ Yawi, gfegus au ku daluap laman gfalag au te, kdi e asalanan. Ay gligungan au sim fagirugan fanggalangun laman nanseg emu.

⁷ Galubad au sik fagusegananun, ay gfoyung au fagayu am nafakamulun at madulo.

⁸ Yawi, kesug au am bale, aroro am fagmasineun gbanwan tua sanya.

⁹ Lag gfaurianan angku, kata am fakamulun sa sangay taw tagasalanan. Ay lag yap gfabul angku kata nu gfabul o takamabul fag ngay taw.

¹⁰ Kabavn tagasalanan fag ngay taw at fakamulun mauri, ay gfanya nu e gfon anya salapi laman nanfamuagan.

¹¹ Dewa katanya, au kdi e suksukan ya asalanan. Nu katanya, afanyui ay falangfei angku.

¹² Yawi, katsi anlangfe ktua siginan ku ngay fagidapun, takata sik dalan at madangsal. Nu katanya, gseg au emu sim ngay taw at fagmafulan.