Alubad. 25 - Fanawbuid tagsibaliwas Fakayabian

Alubad 25 Darangin laman Yawi Gdiri ay Gufud

Dabid at nariruk

^1-2 Yawi, gdarangin au sa emu. Gafanud au sa emu ku Dius. Lag gfabayan ku ngay fawayan nu gbabo ay nu gfapla angku.

³ Nusnga sinu tagafanud sa emu di ban gafaplan, dewa katanya, tagfandaya fag ngay taw umkapla ban.

⁴ Yawi, foyungi angku am ngay balyawvtan.

⁵ Foyungi sa angku nu setain nu nangugali au at matuyan, aroro o wan ku Dius ku tagfalangfe. O way lang ku fagsegun.

⁶ Yawi, amatangi am fakafanyun ay nu mafangesug o, am nafalag sa angku siginan ebi taguna.

⁷ Aroro mafangesug o ay masine, falyami ku ngay asalanan gina au mabaguama.

⁸ Yawi, matuyan tuo ay masine, nu katanya, foyungi sa sangay tagasalanan am balyawvtan.

⁹ Galaga tuo takamababaun fag ngay taw laman gfakamulun tua at matuyan, ay gfoyung o sa anya fagayu am balyawvtan.

¹⁰ Fagayu am nafakamulun gfalag te, mafangesug ay matuyan o sas fagayu tagfaning am ngay suguan.

¹¹ Yawi, aroro matuyan tuo, falyami ku ngay asalanan.

¹² Yawi, foyungi at matuyan fag dalan sas fagayu tagfaning emu.

¹³ Laman ban ngay tagfaning emu namanwan manabayan, ay at ngay kasugfunanan ban gtaglayun gbanwan sis Israel fag talun.

¹⁴ Yawi, kabavn munakbang tuo sa sangay taw tagsuyu emu, ay gfamatang o gugat sanya fagayu am nasadian.

¹⁵ Yawi, o way lang ku fagsegun, aroro o way lang at mafalangfe angku siginans faurianan.

¹⁶ Dungugi ay afanyui angku, aroro sesadi kway ay e gfaidapan angku.

¹⁷ Kaugat way ku fagidapun. Ay falyami siginan angku ku fakabaluun.

¹⁸ Damai ku fagdalanun fag ngay fagidapun, ay falyami wan fagayu ku asalanan.

¹⁹ Damai, ngayu wan ku ngay fawayan, ay kanya fagayu maksvn nu kadotama angku.

²⁰ Kabavn dirii tua angku, ay falyami wan ku fakaplaun, aroro gafanud ktua sa emu.

²¹ Nangugali au sat matuyan ay sat yud e malong, nu katanya, dirii tua angku aroro gafanud ktua sa emu.

²² Dius, falangfei ngay taw Israel siginans mauri.