Alubad. 22 - Fanawbuid tagsibaliwas Fakayabian

Alubad 22 Darangin laman Ggubuk.

Laman sa tagfangguna alubad: Nu karuri kata “Bian sis Balabag.” Dabid at alubad.

¹ Ku Dius, ku Dius! Wain am fagnaubunun angku? Wain am faginyayuun wa angku? Gwayway au gdarangin sa emu, ay wo nagubuk angku.

² Ku Dius, guro koma gugat emu, ay wo gbalus angku, nu katanya, kwa manabayan ya.

³ Dewa katanya, o wan at yud e malong fag Fun, ay ngay taw Israel gseg emu.

⁴ Em ngay mangaguyang gafanud tua sa emu, ay nafalangfe tuo anya fagayu.

⁵ Kanya fagayu nafainfanyuan naet gubuk sa emu ay nafalangfe tuo, ay gafanud tua sa emu, ay di nafaplan.

⁶ Ngay taw gfalingun ay gfapla angku glong te, bunwa au sik taw ya, nu bunway kata kway lang sik ulud.

⁷ Fagayu taw at nalag angku kamalingun gfainsingian at alfuyu, ay glong te,

⁸ “O nunda wo gafanud sas Yawi? Wain at fagyudun gfalangfe emu? Nu glong ro mi, kanya kaylat tua emu. Wain at fagyudun ggubuk emu katsi?”

⁹ Dewa katanya, nadiri tuo angku ebi gina au kasalug, ay siginan nu gsusu au, nadiri tuo angku.

¹⁰ Siginan nu kasalug au, o way lang ku fagsegun, ay o wan ku Dius.

¹¹ Nu katanya, lag o kayayu angku, aroro fagmauriun munakbang si angku, ay we tiba yak taggubuk angku.

¹² Ngayuk fawayan tagligung angku, kata sik ngay baka tama at madot.

¹³ Ay kata yangay ngay liun nu gngarngar laman nanfangagat.

¹⁴ Ku fagmabitsugun namin wan, kata sik mamam at kinkugwag. Ay ku ngay bini kata wa nu nsaruy siginans ngay lufuan. Ay nu gamatang au katinas kwan kata sik lune.

¹⁵ Ay momuy kwan, kata at kinrufa fag tikung, ay ku leplep ankatat wan ay andafut sa ku basad bibig. Yawi, nafabayan wo angku sis wa lukbu, ay ankata au sik mabulan.

¹⁶ Ay at mauri fag ngay taw gligung angku, kata ngay idu. Kanya fagayu nasulbung ku ngay daluap ay ku ngay darafa.

¹⁷ Ay ku ngay bini kalag wan, ay kanya fagayu gdama way lang angku.

¹⁸ Ay kanya fagayu nafudan ku lanbung siginan nu gfafidfilian.

¹⁹ Nu katanya, Yawi, lag kayayu angku. O wan ku fagmabitsugun, gewan gubuki angku.

²⁰ Falangfei angku siginan ku ngay fawayan at ke ngay famabul.

²¹ Falangfei angku sanya ginan fag ngay taw mauri. Kanya fagayu kata sik ngay liun ay sik ngay unwang.

²² Ay namoyung kban sa ku ngay iba sa baliwa emu. Ay gfauseganan kban emu sis fagngayuan taw.

²³ Am fag ngay taw takalimu tua Yawi, segi anya. Am wan, Akub at ngay kasugfunanan, fauseganani ay alimui tua anya.

²⁴ Kanya di gfalingun at yud e kwa. Ay di gtalyuyan ngay tagidapan, nu bunway, kanya gdungug tua ay gbalus anya fagayu.

²⁵ Yawi, aroro sa emu, gfauseganan au emu swabilug ngayuk taw at fagmafulan. Ay sa sangay taw takalimu emu, namafasludan au ku ngay fatuyanan.

²⁶ Ngay taw nangus at yud e kwa gfangon tua ay kapsug. Ay fagayu nangus takakbang sa emu tanan tua nanseg emu. Ay kanya nangus fagayu kabavn gfauseganan tua emu.

²⁷ Ngay taw sas fagdaul daga nangamatang ay nangafoli sas Yawi. Ay fagayu talun at taw nanseg anya.

²⁸ Aroro Yawi sik Fun, ay gfagtainan sas fagdaul daga.

²⁹ Fagayu taw, at maramraman nangadgaloan sas fagmafulun laman namauseganan anya. Ay fagayu takabul grungan gtudan sit daga salubangan.

³⁰ Ay at fadogan ban fag ngay kasugfunanan namakamulun yangay ban kata tam Fun Dius at fakaylatun. Ay kanya ban fagayu gfoyung sat ngay sisian sabaliwa anya.

³¹ Ay anggan ban at yud yay ansalug dumungug yangay, ay e namoyung yangay ban anya fagayu at nafakamulun at matuyan.