Alubad. 2 - Fanawbuid tagsibaliwas Fakayabian

Alubad 2 Dius at Nafili fag Fun

¹ Wain tibak talun at ngay taw at fagamatanganun namawayan? Ay wain at fagfataglayunun at ngay algan at yud e masuad.

² Ngay fun ay ngay tagfangguna anful ay gkamatoan laman gfalganan namawayan Yawi ay at nafili fag fun.

³ Kanya fagayu nalong te, “Kasaman watam ay lag tam nangagbilugan ya sas Dius ay sat nafili fag fun.”

⁴ Dewa katanya, Fun Dius at malunggung sis banwa kase gfalingun kafag ngay taw at ngay algan.

⁵ Dius nasalag ngay taw siginan at maksvn fag dotama, laman kanya fag ngay taw umlimu anya.

⁶ Ay Dius nalong te, “Nafalunggung kwan ku nafili fag fun sat yud e malong fag Buksul Siun.”

⁷ Dius at nafili fag fun glong te, “Garingang au Yawi at nalong sa angku te, ‘O wan ku baguama, ay siginan katsi fag menit, au wan am mama.

⁸ Eti sa angku, ay gfon au emu ngay talun sas fagdaul daga, laman am fagnangagbilugun ban.

⁹ Ay siginan am fagmabalyananun gbabo ban o am ngay fawayan. Ay grufa ban o anya fagayu kata sik tikung.’ ”

¹⁰ Nu katanya, am fag ngay fun ay fag ngay tagfangguna, amatangani ay dungugani tuy fag ngay famararang.

¹¹ Fakamuluni at ke fakalimuun sas Yawi, ay fauseganani sa anya.

¹² Fababauni sas Dius at nafili fag fun aroro nu dway am gfakamulun takatanya, kanya kadotama ay masakit gfauri ayu. Dewa katanya, mauseganan tua fagayu taw tagsarirung sis Yawi.