Alubad. 19 - Fanawbuid tagsibaliwas Fakayabian

Alubad 19 Dius at Fagmabalyananun Kalag siginan at ngay Awatan

Laman sa tagfangguna alubad: Dabid at alubad.

¹ Banwa gfalag te, Dius mabalyanan. Ay at ngay awatan tagsis banwa gfalag te, kanya e fagsafulun.

² Kayu menit ay kayu yabi, kafag ngay awatan gfasaful te, Dius tua at mabalyanan.

³ Deyud e kadungug aringang siginans banwa,

⁴ kanya gfoyung sas fagdaul daga sabaliwas Dius. Dius nawat menit at fagbanwanan sis banwa.

⁵ Galay balabag, menit kasure, kata sik mangama at bagu kadadwa, ay tagfanagsag gduksun siginan at fakadadwaan fag bale. Ay kata sik tagawean at mabitsug, takaylat yay nandog nanggudgunan.

⁶ Menit kasure siginans fakamenitan, ay kafalyu sas fakayabian. Ay we masuksuan at sugba.

Yawi at Suguan

⁷ Yawi at suguan matuyan tua. Ay at ngay foyungan mafanud, ay mafon fagsafulun sat yud e fagsafulun.

⁸ Yawi at ngay faugali matuyan ay gfon fagmanabayanun sa sangay taw. Ay at ngay suguan mayamag, ay gfae fagsafulun ngay taw.

⁹ Fagsuyuun sas Yawi tagfayayu ngay taw siginans asalanan, ay kabavn katanya tua gugat. Nu ginsaful ay nu gfawabilugan mafanud tua ay matuyan.

¹⁰ Am ngay longan amafanud yap tua gintu, ay amatamis yap tua sas deut.

¹¹ Ay am longan sik famararang sa angku am fagsuguan. Ay nu nafaning ktua ban takatanya e famonun ban daul sa angku.

¹² Nusnga sinu wa saful at asalanan. Nu katanya, falyami wan ku ngay asalanan ku fagyudun saful.

¹³ Ay fayayui angku siginan ku natikis fag asalanan, lag o gfabayan kanya fagayu nu gagbilug angku, laman ban gugali ktua at yud e malong, ay kdi kamabo ya.

¹⁴ Yawi, o wan ku fagsarigan ay ku tagfalangfe. Nangus ku amatanganan ay ku longan maylat tua sa emu.