Alubad. 18 - Fanawbuid tagsibaliwas Fakayabian

Alubad 18 Dabid at Alubad gina Gbabo

Dabid, Dius at fagsuguan at nariruk fag alubad. Laman sa tagfangguna alubad. Tuy at alubad gina Dius gfalangfe anya siginans Saul ay tiba at ngay fawayan.

¹ Yawi, kesug au emu, siginan wa emu ku fagmabitsugun.

² O wan ku fagsarigan at mogat ay ku tagbalabag, O wan ku tagfalangfe, ku tagdiri, ay ku taggubuk.

³ Yawi, anud sa way lang emu nung au guseganan, aroro gina au nadarangin sa emu, nafalangfe tuo angku siginan ku ngay fawayan.

^4-5 Fakabulun kata sik fansiuk at nabarikus ku bilug ay kata sik sangdaw si ku dalan, ay kata yangay sik tagbia fag lugwak at nafalimus angku.

⁶ Gina au e fagafanawaun, nauro au sas Yawi ku Dius te, “Gubuki angku!” Ku darangin andasug sat bale, ay nadungug tua angku.

⁷ Siginan Yawi at dotama fagdaul daga nauigan, ay nauigan yangay anggan ngay buksul at fagtungkudan.

⁸ Sik anus naduksun siginan at dungus, ay sik afuy tagigang ansure siginan at bibig.

⁹ Ay kanya naluang banwa ay andaga sanya ginan, ay antungkud si sik linyabu madamvl.

¹⁰ Sik tagbarita ay sik tagmara nabuba anya masakit.

¹¹ Ay kanya nagbilug dulum ay sik malayung fag linyabu laman at famarum anya.

¹² Ay nalimbad siginan at fagbanwanan sbanwa, ay yelu fag arak ay singsing tagigang antong sanya ginan.

¹³ Yawi, Tiba Tungud fag Dius, at aringang kadungug siginans banwa kata sik lingsi.

¹⁴ Limbad wan am famana am ngay fawayan, ay kanya fagayu nalagyu ay nafansaruayanan way lang.

¹⁵ Siginan nu guro kadotama, kanya nafalanggang dagat. Ay fagdaul daga anggan at fagtungkudan ansure.

¹⁶ Ay siginans banwa kanya nadasug tua angku. Ay nalakwi tua angku siginans fagngabasadan lino.

¹⁷ Kanya nafalangfe angku siginan ku fawayan at mabitsug, ay siginan yangay ngay taw takauri angku, aroro kwa makatu gfawayan.

¹⁸ Ku ngay fawayan nafawayan angku gina au e fagidapun. Dewa katanya, Yawi nagubuk tua angku,

¹⁹ ay nafalangfe angku siginan at malimu, aroro kesug tua gugat angku.

²⁰ Ay aroro matuyan ktua, kanya nafon tua sa angku fagayu nusnge wain. Kdi e nafakamulun mauri, nu katanya, nafafoli tua sa angku fagayu at nalyam si angku.

²¹ Gfaning ktua Yawi at fakaylatun, ay kdi natalyuyan anya.

²² Nafaning ktua fagayu at suguan, ay kdi nafamabo at ngay faugali.

²³ Dius nasaful te, fagdaul ku amatanganan sa way lang anya, ay gsaruy ktua fagmauriun.

²⁴ Ay aroro matuyan ktua, kanya nafon tua sa angku fagayu nusnge wain. Kdi e nafakamulun mauri, nu katanya, nafafoli tua sa angku fagayu at nalyam si angku.

²⁵ Yawi, matuyan tuo sas fagayu taw at matuyan, ay at masine gugat sa emu.

²⁶ Malukme tuo sat matuyan fag ngay taw, ay kadotama o at yud matuyan fag taw.

²⁷ Ay gfalangfe tuo takamababaun, dewa katanya, gfababa o takamatungudun fag ngay taw.

²⁸ Yawi, ku Dius, o wan ku salung, ay gyamag o angku gina au sisad dulum.

²⁹ Siginan am gubuk, makatu ktua gfawayan dewa ngayu, ay masakfo kway at fagsarigan fag dingding alad.

³⁰ Dius at balyawvtan kasakan. Ay at longan matuyan. Dius wan taggubuk ngay taw taget gubuk sa anya.

³¹ Yawi, o wan at matuyan fag Dius, ay we tiba ya. Ay o way lang ku fagsarigan fag gang.

³² Dius gfon angku ku fagmabitsugun, ay gdiri angku sa ku ngaba dalan.

³³ Ay kanya nafagaras ku darafa, kata sik arasyo at darafa nu magaras, laman maundaud au dewa sat matubi fag dalan.

³⁴ Ay nafananad tua angku sa nu gfawayan. Nu katanya, dewa sanbung fag godun, mafaton kway.

³⁵ Kata o sik famalabag at nabalabag angku. Ay siginan am gubuk, ansik takadungug au.

³⁶ Nu katanya, nafabia o ku dalan, ay kdi andangsal.

³⁷ Nafafalo au ku ngay fawayan ay nasud ktua, ay kwa nafaragang nu gfafalo au yakmay kanya fagayu namin.

³⁸ Nabasing au ku ngay fawayan, ay kanya fagayu anrunguy, ay anbul si ku daga salubangan.

³⁹ Nafon o angku fagmabitsugun laman gfawayan au, nu katanya, nababo ktua ku ngay fawayan.

⁴⁰ Ay nafababawan tuo sa angku, ay naiyan, ay nafabul kwan fagayu takadotama angku.

⁴¹ Kanya fagayu naet gubuk, dewa katanya, we nagubuk anya. Ay naet yangay gubuk anggan sa emu, dewa katanya, wo nabalus.

⁴² Narufa au anya fagayu kata lukbu, tagmara at fagmafalayugun. Ay naukas au anya fagayu nusnga nday kata sik ngay nakaurian.

⁴³ Nafalangfe tuo angku siginan takamabo fag ngay taw, ay nafili o angku sik funan sa tibak talun ku fagyudun toglag, ay nafafagsuguanan tuo sa angku kanya fag ngay taw.

⁴⁴ Kanya fagayu nu nadungug sabaliwa angku, gfaning wa vtv angku. Ay kanya fag ngay betaw maksvn nu kalimu, ay grungan si ku daga salubangan.

⁴⁵ Kanya fagayu anmomuy at ngay amatanganan, ay gduksun siginan at fagsuksuanan, gtadtaruyan kalimu.

⁴⁶ Yawi, gleleg tuo kabavn! Ay gfauseganan ami emu, aroro o wan at mogat fag fagnansarigan, takata sik gang. Dius, o wan ku tagfalangfe ay ku fagfausegananun.

⁴⁷ Ay nafasud tuo ku ngay fawayan, ay nafagbilug tuo sa angku tibak talun at ngay taw.

⁴⁸ Nafalangfe tuo angku ay nafababo siginan ku ngay fawayan at madot.

⁴⁹ Nu katanya, gfauseganan au emu sa sangay talun at ngay taw. Yawi, galubad au sik ngay alubad tagfauseganan emu.

⁵⁰ Nafon tuo sam nafili fag fun at madulo fag ngay famabo. Ay kabavn ban gfalag o te, mafangesug tuo sas Dabid ay anggan sat ngay kasugfunanan.