Alubad. 17 - Fanawbuid tagsibaliwas Fakayabian

Alubad 17 At Matuyan fag Taw at Darangin

Dabid at darangin

¹ Yawi, dungugi ku darangin ay ku fagetun sa emu, aroro ku darangin matuyan, ay kabavn ku ngay nalong matuyan tua.

² Saful o nusnga sinu tagfakamulun at matuyan. Nu katanya, foyungi sas fagayu taw te, kdi e asalanan.

³ Nainsaful o ku amatanganan, ay dewa sad yabi nafaskud o angku. Ay wo e nalag si angku nusnga setaw fag asalanan, ay kwa nalong at mauri kata tibak taw at fakamulun,

⁴ ay nafaning ktua am ngay suguan. Ay kanya fagayu tagfayayu angku siginan tagugali at mauri fag ngay taw.

⁵ Kabavn gfaning ktua sam fakaylatun fag dalan, ay kwa gsaruy.

⁶ Dius, gdarangin au sa emu aroro saful au te, gbalus tuo angku. Dungugi ku ngay fagetun.

⁷ Falagi sa angku te, mafangesug o siginan am ngay fakamulun at madulo. Siginan am fagmabalyananun, gfalangfe o fagayu at nansarirung sa emu, aroro e ngay fawayan.

⁸ Alagai angku kata ngay taw nu gdiri at ngay mata, ay suksuki angku kata sik fanginan nu glub at ngay riangan sit daga fakfak.

⁹ Falangfei angku siginan ku ngay fawayan si ku ligung tagyafabulun angku.

¹⁰ Kanya fag ngay taw nu garingang kamatungudun ay we fakafanyun.

¹¹ Ay katsi kanya fag ngay taw grvbvy ay gligung angku, ay gfanya sik buknga laman nandalusung angku.

¹² Kanya fagayu kata ngay liun gsuksuan gfanya ay mafalganan namasadsamanan ku afud bilug.

¹³ Yawi, fawayani ay baboi ku ngay fawayan. Falangfei angku siginan am fagmabalyananun takata sik fiso at maglat.

¹⁴ Siginan am fagmabitsugun, falangfei angku sanya ginan fag ngay taw, aroro at fagamatanganun tagste way lang sfagdaul daga. Gfamut o at ngay ramraman, ay gfayu o at ngay sisian, ay kanya fagayu gfagbilug at ngay ramraman sat ngay kasugfunanan.

¹⁵ Ay au, matuyan ktua, ay lumag au emu. Nu nfulo kwan, lumag au am fagmasineun, ay nu katanya umke fagmanabayanun au.