Alubad. 16 - Fanawbuid tagsibaliwas Fakayabian

Alubad 16 At ke Fagafanudun sas Dius at Darangin

Dabid at alubad

¹ Dius, dirii angku, aroro o wan ku fagnansarigan.

² Yawi, o wan ku Fun. Ay siginan emu, fagayu nusnge wain at masine tagsi angku.

³ Sabaliwa sangay taw at yud e malong tagbanwan sis talun Israel, gfauseganan au ayu.

⁴ Ay dewa katanya, fagayu tagseg tibak fagsegan umfamut ban at ngay fagidapun. Ay kwa galo nu namon taguk sa tibak ngay fagsegan, ay kwa glong kafag ngay fagsegan at ngay ngayan.

⁵ Yawi, aroro si tuo angku, kwe fagayudanun ya, ay kabavn gbakvd o sa ku fagunan.

⁶ Fagayu am nafon sa angku masine, kata sik fanggalangun fag daga am nafon sa angku.

⁷ Yawi, gfauseganan au emu, ay o wan ku tagfamatang. Ay dewa sad yabi, ku amatanganan gfamatang tua gugat angku sabaliwa emu.

⁸ Kabavn gamatang ktua gugat emu, ay kdi kamomuy, aroro gufud tuo gugat angku.

⁹ Nu katanya, guseganan au, ay manabayan, aroro kdi e fakalimuun ya.

¹⁰ Wo nafabayan ku falad si sangay kinbul at talun, ay di o naylat au, am fagsuguan at matuyan, nu kadan sis fagfolian.

¹¹ Nafoyung o sa angku dalan tagsas leleg at yud e fakatabuan, ay gfon tuo angku fagusegananun sim daga salubangan, ay fagmabayanun at yud e fakatabuan.