Alubad. 148 - Fanawbuid tagsibaliwas Fakayabian

Alubad 148 Ggewan laman Gseg Dius

¹ Segi Yawi! Am tagsis banwa, segi Yawi.

² Am at ngay tagfawayan fag ngay tagbarita, segi anya.

³ Segi yangay anya, menit, magdanun, ay ngay galeme.

⁴ Anggan banwa, ay linyabu tagsis kiwang, segi anya.

⁵ Yawi at ngay awatan, segi anya, aroro siginan nu gsugu, ankawat am.

⁶ Ay kanya nafabanwan at ngay nawat sat nafalganan fag ngay fagbanwanan, ay kanya ban fagayu kabavn gbanwan sit mesa fagbanwanan, aroro di ban ginbalian Yawi at longan sat ngay nawat.

⁷ Segi Yawi, am tagsis fagdaul daga, ay anggan am tagsis fagngabasadan dagat tagbia ayu daul fag ngay tagleleg.

⁸ Segi Yawi, am fag ngay limbad, ay linyabu, ay fag arak at maksvn nu marios, ay fag arak yelu takadaul ngay gang ayu sirut, ay at maksvn fag tagmara tagfaning at ngay suguan.

⁹ Segi Yawi, am fag ngay buksul ay fag ngay fulug, ay anggan am fag ngay kayu tagrawvg, ay anggan ngay kayu sidru.

¹⁰ Segi Yawi, anggan am fag ngay mangilafang tagsis talun ay ngay fagbaugun, tagalafang ay ngay manuk tungud.

¹¹ Segi Yawi, anggan am fag ngay fun, fag ngay tagfangguna, fag ngay fagtainan, ay fagayu taw sas fagdaul daga.

¹² Segi Yawi, anggan am fag ngay baguama ay fag ngay baguina, ay anggan am fag ngay fagtainan ay fag ngay sisian.

¹³ Fagayu am segi Yawi, aroro kanya tua tiba tungud sas fagayu, ay at fagmasineun gtungud tua sas fagayu at awatan tagsis banwa ay tagsis daga.

¹⁴ Kanya nafabitsug at nafili fag ngay taw Israel, laman kanya fagayu gfauseganan anya. Kanya nafakamulun takatanya laman sat fakesugun fag ngay taw Israel at matuyan sa anya. Segi Yawi!