Alubad. 147 - Fanawbuid tagsibaliwas Fakayabian

Alubad 147 Fagusegananun sat Mabalyanan fag Dius

¹ Segi Yawi! Masine nu galubad tam gfauseganan tam Dius. Maylat tua gfauseganan anya.

² Yawi gdog yay kawat furuan Erusalem. Ay gfaful at natabanan fag ngay taw Israel.

³ Kanya ban gfasun fagayu takabalu. Ay gsifig ngay taw at bangbang laman gfafia.

⁴ Kanya saful way galeme at kayuan, ay nafae ngayan galay at sadi.

⁵ Tam Dius mabalyanan, ay at fagsafulun di e fakatabuan.

⁶ Yawi ggubuk fagayu tagafalingunan, ay kanya gfataygilid at mauri fag ngay taw laman gfaurianan.

⁷ Alubadi fauseganani Yawi tam Dius, ay fawangi fagfawangun ke ngay bakyang laman sa anya.

⁸ Aroro kanya mafafagdaul tua linyabu sas kiwang, ay gfarak tua gugat sas daga, ay gfatugbung ngay makmak sa sangay buksul.

⁹ Kanya gfon tua fakonun sa sangay fagbaugun, ay gfon yangay anggan sa sangay ugak at ngay riangan takalunus.

¹⁰ We masuad sa anya at mabitsug fag kabayu, ay at maseganama fag ngay tagfawayan.

¹¹ Dewa katanya, kanya guseganan tua ngay taw tagsuyu anya, ay tagafanud te, mafangesug tua.

¹² Am fag ngay tagbanwan sis Erusalem, segi Yawi tam Dius,

¹³ aroro kanya gfasik ngay mogat tua gugat ay furuan at ngay sakbawan, ay gfon tua gugat sa ayu nusnge wain.

¹⁴ Kanya gfae fagmanabayanun tua gugat ay talun, ay gfon sa ayu at masine fia fag ngay gutluan.

¹⁵ Kanya gfadasug at ngay suguan sas fagdaul daga, ay at longan masakit kafasludan.

¹⁶ Ay kanya gfadasug gugat arak at maksvn nu marios kata at marafadan fag umut malaksi, ay gfadasug yangay sik kintugas fag damug sis daga kata dafug.

¹⁷ Ay kanya nu naukas kafag yelu fag arak takadaul ngay gang ayu sirut; maksvn nu marios, ay we magwanta.

¹⁸ Sanya ginan, kanya nasugu te, “Atinasi wan.” Ay nafatagmara, nu katanya, kafag mamam antinas ay nafamilugan.

¹⁹ Yawi nalong at ngay longan ay anggan at ngay faugali sas Akub at ngay kasugfunanan fag ngay taw Israel.

²⁰ Kanya wa nafakamulun takatanya sa tibak talun. Nu katanya, kafag ngay talun at taw wa saful at ngay suguan. Segi Yawi!