Alubad. 145 - Fanawbuid tagsibaliwas Fakayabian

Alubad 145 Fagusegananun fag Alubad

Dabid at famauseganan fag alubad.

¹ Ku Fun Dius, kabavn ban gfabat au am ngayan ay gfauseganan emu.

² Gfauseganan kban emu kayu menit, ay kabavn ban namakamulun au takatanya.

³ Yawi, o wan at mabalyanan, ay takafauseganan, ay we mafatuyan te, kamabalyanan tuo nya.

⁴ Ay galay ban kasugfunanan gfoyung sat ngay sisian, sabaliwa am ngay nafakamulun at mabalyanan.

⁵ Gamatangan kban gugat sabaliwa am fagmasineun ay am fagmabalyananun, ay sabaliwa am ngay nafakamulun at madulo.

⁶ Ngay taw ban glong sabaliwa am ngay nafakamulun at madulo, ay gfoyung kban sabaliwa am fagmabalyananun.

⁷ Kanya fagayu gfoyung sabaliwa nu mafangafanyu o, ay guseganan galubad sabaliwa am fagmatuyanun.

⁸ Yawi, mafangafanyu tuo ay mafanggubuk, ay di o masakit gfangadotama, ay nu mafangesug o, kabavn tua.

⁹ Yawi, matuyan tuo sas fagayu, ay kafanyu tuo fagayu am nawat.

¹⁰ Yawi, fagayu am ngay nawat gfauseganan emu; am ngay taw at matuyan sa emu, gfauseganan tua emu.

¹¹ Kanya fagayu glong te, mabalyanan tuo, ay nu gfagtainan o, masine tua.

¹² Nu katanya, fagayu ban taw sumaful te, am ngay nafakamulun madulo, ay nu gfagtainan o, masine tua.

¹³ Yawi, nu gfagtainan o sas fagayu kasugfunanan, kabavn tua. Gfafasludan tuo gugat am ngay fatuyanan, ay sas fagayu am fakamulun, mafangafanyu tuo.

¹⁴ Ggubuk tuo at kintaygilid fag ngay taw, ay gfabitsug tuo fagayu at kinmomuy aroro ankabyat at famubaun.

¹⁵ Fagayu taw gsarig sa emu, ay gfon tuo at ngay fakonun sit kasakan fag buknga.

¹⁶ Kamon tuo ay gfapsug o fagayu tagleleg.

¹⁷ Yawi, fagayu am balyawvtan matuyan, ay sas fagayu am fakamulun, mafangafanyu tuo.

¹⁸ Munakbang tuo sit matuyan fag ngay taw taguro tua gugat sa emu.

¹⁹ Gfon tuo sa sangay taw tagsuyu emu at ngay fakaylatun, ay gdungug tuo nu guro get gubuk, ay gfalangfe tuo anya fagayu.

²⁰ Gdiri tuo ngay taw takesug emu, dewa katanya, gfabul wo at mauri fag ngay taw.

²¹ Yawi, gseg au emu, ay kabavn ban nangus fagayu tagleleg gfauseganan emu.