Alubad. 144 - Fanawbuid tagsibaliwas Fakayabian

Alubad 144 Sik Fun at Fagusegananun aroro Nababo

Dabid at nariruk.

¹ Segi Yawi, ku fagsarigan fag gang, at tagfananad angku sa nu gfawayan.

² Sia wan takesug angku, ay ku fagsarigan at mogat. Ay sia yangay ku tagbalabag, ku tagfalangfe ay ku tagbakvd. Ay kanya gfagbilug sa angku ngay talun.

³ Yawi, semafanud tua nunda taw sa emu? Kanya sik taw way, wain am fagamatanganun tua anya?

⁴ Kanya kata way tagmara, ay at leleg kalyam way kata sik aninu.

⁵ Yawi, luangi banwa ay duksuni. Ay nanted o ngay buksul, laman umke anus.

⁶ Ay fae limbadi kata sik ngay bangko, laman ku ngay fawayan lumagyu gsaruayan.

⁷ Siginans banwa, dasugi ay falangfei angku siginan ku ngay fawayan tagsiginan tibak talun, aroro kanya fagayu madot, kata at magaras fag familugan.

⁸ Dewa kanya fagayu gfatuyanan te, at longan matuyan, kamuag way.

⁹ Dius, galubad au sa emu sik bagu fag alubad, ay gfasfuan au gfawang fagfawangun ke ngay bakyang.

¹⁰ O tua tagfababo ngay fun, ay nafalangfe tuo angku, am fagsuguan Dabid, siginan takamabul fag ngay taw.

¹¹ Falangfei angku siginan ku ngay fawayan tagsiginan tibak talun, aroro kanya fagayu kamuag. Dewa kanya fagayu gfatuyanan te, at longan matuyan, kamuag way.

¹² Em ngay munama nangus kaduge kagurang, kata tua sik tanum takabia ay at mogat. Ay em ngay munina nangus at masine umkata sik ngay turuk at ke ngay rarawan masine tagsis fun at bale daul.

¹³ Em ngay fagfungsuan nangus em ngay gutluan, umkapnu nusnga setaw fag gutluan. Ay em ngay tupa nangus umkayu yud e mafatap ya sa sangay fagfafangonan.

¹⁴ Ay umkayu yangay nangus em ngay famaloun em ngay baka at fagnamubaun. Ay em ngay fawayan nangus wa nangiklas ya em alad furuan, ay wa ban nangus nantaban ya emi. Ay wa nangus e guro ya kalimu si em ngay dalan.

¹⁵ Mauseganan tua ngay taw at kayaunanan nu katanya tua! Ay kaugat nu mauseganan ngay taw at Dius nu Yawi tua.