Alubad. 143 - Fanawbuid tagsibaliwas Fakayabian

Alubad 143 Darangin Laman Dius Ggubuk

Dabid at alubad.

¹ Yawi, dungugi ku darangin. Dungugani nu gfainfanyuan au get sa emu. Gubuki angku, aroro matuyan tuo ay masine.

² Lag yap ginsaful angku am fagsuguan, aroro we taw matuyan sam daga salubangan.

³ Ku ngay fawayan nafaurianan angku. Ay kanya fagayu nafataygilid ay nasiad angku, ay naubung angku sat madulum fag fagubungan, kata sik taw taglugo wan nu mabulan.

⁴ Nu katanya, kwe fagsegun ya. Ay maksvn wan nu kalimu au.

⁵ Namatang au at kinlangfe fag ngay buknga, ay namatangan au am ngay nafakamulun at madulo.

⁶ Nafabat au ku daluap, laman gdarangin au sa emu. Kaylat au gfakamatoan emu, kata sik matat fag daga tagayudan mamam.

⁷ Yawi, gubuki angku masakit, aroro kwe fagsegun ya. Ay lag gtalyuyan angku, aroro mankata au ngay taw at kinbul wan.

⁸ Galay balabag famatangi angku sabaliwa nu mafangesug o, aroro gafanud au sa emu. Foyungi sa angku at matuyan fag dalan ku fagnanlaoan, aroro nafatigwanan kwan ku sadili sa emu.

⁹ Yawi, falangfei angku siginan ku ngay fawayan, aroro o wan ku fagsarirungan.

¹⁰ O wan ku Dius, nu katanya, foyungi angku laman gfaning ktua am fakaylatun. Nangus am Masine fag Falad gtaban tua gugat angku sat masine fag dalan.

¹¹ Yawi, falangfei angku, laman ban e gfauseganan tua emu. Ay siginan am fagmatuyanun, falangfei angku siginan sangay fagidapun.

¹² Kesug tuo angku, am fagsuguan, nu katanya, fabuli wan ku ngay fawayan.