Alubad. 140 - Fanawbuid tagsibaliwas Fakayabian

Alubad 140 Darangin laman Dius Ggubuk

Laman sa tagfangguna alubad: Dabid at alubad.

¹ Yawi, falangfei angku, siginan sangay taw at mauri ay tagfangadotama.

² Kanya fag ngay taw at algan mauri way, ay kayu menit kanya fagayu gfae awayan.

³ Kanya fag ngay taw at ngay longan mauri, kata sik ule at ke ganga.

⁴ Yawi, dirii angku siginan sangay taw at mauri ay at madot, at ke algan namaurianan angku.

⁵ Takamatungudun fag ngay taw nafoli sa ku dalan sangdaw ay fanggamat albon, laman nanggamat angku.

⁶ Yawi, o wan ku Dius. Nu katanya, dungugi tua nu get au sa emu te, afanyui angku.

⁷ Yawi, ku Fun, mabalyanan tuo ay ku tagfalangfe, nadiri tuo angku gina e awayan.

⁸ Yawi, lag o gfon sat mauri fag taw at ngay fakaylatun. Ay lag yangay kaylat at ngay algan nu kafasludan, laman ban kanya fagayu di kamatungudun.

⁹ Ku ngay fawayan maligung angku. At ngay longan nangus at mauri sa angku umfoli sa anya fagayu.

¹⁰ Fafakwani sa kafag ngay taw tagigang fag ngay singsing afuy. Ay fatongi anya fagayu sasad lusung, laman ban wa gdog ya kabangkad.

¹¹ Ngay taw nangus taglong mauri umkalyam wan siginan em talun. Ay umdasug nangus faurianan sat madot fag ngay taw, laman ban kanya fagayu umbul wan.

¹² Yawi, nasaful au te, gdiri tuo at yud e kwa siginan tagfaidapan anya, ay nasaful kyangay te, gfon yangay o fagmatuyanun sa tagayudan.

¹³ Anud, at matuyan fag ngay taw gseg emu, ay kabavn kanya fagayu gbanwan sim day tigyangan.