Alubad. 14 - Fanawbuid tagsibaliwas Fakayabian

Alubad 14 Ngay Taw at Fagmauriun

Laman sa tagfangguna alubad: Dabid at alubad.

¹ At yud e fagsafulun fag ngay taw gamatangan te, “We Dius!” Kanya fagayu at ngay nafakamulun maksvn nu mauri. Ay nusdi sadi we gfakamulun ya at masine.

² Siginans banwa Yawi gdama te, o e ngay taw yay tagtogdungug ay tagrvbvy yay anya.

³ Dewa katanya, we matuyan ya! Fagayu taw maksvn at asalanan, ay nasaruy wan at matuyan fag dalan. Ay nusdi sadi, we gfakamulun ya at masine.

⁴ Seduge yaban at mauri fag ngay taw nu katogdungug? Kanya fagayu gfaylatan ku fagfanggunaun fag ngay taw laman mafabul kata at naylatan. Ay kanya fagayu wa gdarangin sas Yawi.

⁵ Dewa katanya, kanya ban fagayu umlimu maksvn, aroro Dius gufud tua ngay taw tagafanud sa anya.

⁶ Kanya fagayu gsalag at yud e kwa fag ngay taw at ngay algan, dewa katanya, at yud e kwa fag ngay taw at fagsarigan, Yawi tua.

⁷ Umdasug wa nangus fakalangfeun sa sangay taw Israel siginans Buksul Siun! Ngay taw Israel ban guseganan, gina ban Yawi gdog nafae fagmanabayanun anya fagayu.