Alubad. 135 - Fanawbuid tagsibaliwas Fakayabian

Alubad 135 Famauseganan fag Alubad

¹ Segi Yawi! Am at ngay fagsuguan, kabavn segi anya,

² am fag ngay taw tagfakamulun sis Yawi at bale.

³ Segi Yawi, aroro kanya matuyan, ay alubadi tagfauseganan anya, aroro katanya at fakaylatun.

⁴ Aroro kanya nafili tua ngay taw Israel, Akub at ngay kasugfunanan, laman at ngay taw.

⁵ Nu katanya, nasaful au te, Yawi tua tiba tungud, sas fagayu fagsegan.

⁶ Yawi mafakamulun nusnga setaw at fakaylatun sas banwa, sas daga, ay anggan sas fagngabasadan dagat.

⁷ Kanya mafae linyabu siginan sik fungfung daga ay mafadasug yangay sa sik fungfung daga. Kanya gfalimbad ay gfarak ay gfatagmara siginan at mesa fagduksunan.

⁸ Kanya nafabul ngay taw Igiptu at ngay sisian tiba kaka, ay anggan at ngay fagbaugun at ngay riangan taguna.

⁹ Kanya nafakamulun sa sangay taw Igiptu nusnge wain at madulo, laman gfaurianan kafag talun at fun gasfuan at ngay tagfangguna.

¹⁰ Kanya narasras ngayuk talun, ay nafabul yangay at ngay fun, dewa maseganama.

¹¹ Kanya nafabul fun Sikun, ngay taw Amur at fun, ay fun Ug, talun Basan at fun, ay fagayu fun tagsis talun Kanaan.

¹² Ay kanya nafagbilug kafag ngay fun at daga sat ngay taw Israel.

¹³ Yawi, kabavn ban fagayu kasugfunanan di kalyam am ngayan,

¹⁴ aroro kabavn ban gfababo tuo am nafili fag ngay taw, ay kafanyu tua ban o gugat am ngay fagsuguan.

¹⁵ Tibak talun at ngay fagsegan, taw way at nawat, at fangawat gintu ay salapi.

¹⁶ Kafag ngay fagsegan e bibig oma, ay wa maringang, ay e mata oma, ay wa glag,

¹⁷ ay e ngay talinga oma, dewa katanya wa gdungug, ay kanya fagayu we engasan.

¹⁸ At nawat kafag ngay fagsegan ay fagayu tagseg, umkata kafag ngay fagsegan.

¹⁹ Dewa katanya, am fag ngay taw Israel, ay Arun at ngay sugfun, segi Yawi!

²⁰ Segi Yawi, anggan am Lebi at ngay sugfun, ay fagayu am tagsuyu anya.

²¹ Segi Yawi sis Buksul Siun, aroro kanya gbanwan tua sis furuan Erusalem. Segi Yawi!