Alubad. 122 - Fanawbuid tagsibaliwas Fakayabian

Alubad 122 Fagusegananun sas Erusalem

Alubad gina gundaud sas Erusalem. Dabid at nariruk.

¹ Guseganan au, nu nadungug au ngay taw nu glong te, “Bastam wan sas Yawi at bale.”

² Ay katsi andasug watam, ay malindug sis Erusalem at sakbawan.

³ Erusalem sik mogat fag furuan daul at masine nu mawatan.

⁴ Ay kata at faugali, Israel at ngay gaban, Yawi at nafili fag ngay taw, stie gugat laman nanseg Yawi.

⁵ Ste yangay fag furuan, Dabid at ngay kasugfunanan fag ngay fun nu nanmalunggung laman nanginsaful.

⁶ Darangini laman furuan Erusalem manabayan tua gugat. Ay manabayan tua ban nangus gugat fagayu takesug tuy fag furuan.

⁷ Furuan Erusalem ban nangus manabayan tua gugat, ay fun ban nangus at bale daul umke fagmanabayanun.

⁸ Aroro kesug au ku ngay faduksay ay ku ngay fagadgalangan, katsi glong au sas furuan Erusalem te, “Fagmanabayanun si wa emu.”

⁹ Aroro kesug au Yawi tam Dius at bale, gdarangin au, laman furuan Erusalem umke fagmanabayanun ay umramraman.