Alubad. 118 - Fanawbuid tagsibaliwas Fakayabian

Alubad 118 Fagusegananun aroro Nababo

¹ Fauseganani Yawi, aroro kanya matuyan tua, ay nu mafangesug di e fakatabuan.

² Ngay taw Israel, longi te, “Yawi nu kesug di e fakatabuan.”

³ Arun at ngay kasugfunanan, longi te, “Yawi nu kesug di e fakatabuan.”

⁴ Fagayu am tagsuyu Yawi, longi yangay te, “Yawi nu kesug di e fakatabuan.”

⁵ Gina au e fagidapun, ankakbang au sas Yawi, ay kanya nabalus tua ay nafalangfe angku.

⁶ Yawi gufud tua angku, nu katanya, kdi e fakalimuun. Nataw ya nunda ngay taw at fagmafakamulunun sa angku?

⁷ Yawi gufud ay ggubuk angku. Ay glag kban ku ngay fawayan nu gababawan.

⁸ Amasine yap nu sa tuas Yawi nu gafanud tam, abat ngate sas taw.

⁹ Amasine yap tua nu gafanud tam sas Yawi, abat ngate sa sangay tagfangguna.

^10-11 Ku ngay fawayan fag talun maligung angku laman namawayan, dewa katanya, siginan Yawi at fagmabalyananun, nababo ktua anya fagayu.

¹² Kanya fagayu gina namawayan angku, ngayu kata ngay gabe kakin. Dewa katanya, kanya fagayu masakit kalyam, kata nagbiluganan fare nu kairug. Siginan Yawi at fagmabalyananun, nababo ktua anya fagayu.

¹³ Kafag ngay taw wa gfaragang nu gfawayan angku, ay arvs nababawan kwan, dewa katanya, Yawi nagubuk tua angku.

¹⁴ Yawi wan ku fagmabitsugun, ay galubad au sabaliwa anya, aroro kanya nafalangfe tua angku.

^15-16 Yawi nafakamulun at ngay madulo ay nafababo at ngay taw, siginan at fagmabalyananun. Nu katanya, kanya fagayu guro guseganan sit mesa bale ramit.

¹⁷ Dewa ngayu ku ngay fawayan, kya nbul, gleleg kyay dasug katsi, laman gfoyung kban gugat Yawi at ngay nafakamulun.

¹⁸ Yawi dewa nafaurianan angku maksvn, kanya di nafabayan nu kabul au.

¹⁹ Luangi Yawi at bale, ngay taw matuyan at fagmafulan, ay gsakbo au, laman namauseganan au anya.

²⁰ Tuy Yawi at bale at sakbawan, ay tagsakbo stae, at matuyan way lang fag ngay taw.

²¹ Yawi, gfauseganan au emu, aroro nabalus tuo ku darangin, ay nafalangfe tuo angku.

²² Ngay takawat bale at naukas fag gang, ansik fagfatungkudan turuk.

²³ Yawi wan at nafakamulun takatanya, at maksvn nu madulo sa antam.

²⁴ Yawi nawat tuy fag menit, nu katanya, guseganan tam aroro sa anya.

²⁵ Yawi, falangfei tua gugat emi. Ay gubuki emi sas fagayu em fakamulun.

²⁶ Yawi ban nangus ggubuk tua at nasugu takadasug, ay gfauseganan ban mi anya sis Yawi at bale.

²⁷ Yawi at matuyan fag Dius, ay kanya gyamag antam. Bubai fanggalangun, ay siuki sas tungud fagirugan.

²⁸ Yawi wan ku Dius, gfauseganan au ay gseg anya.

²⁹ Fauseganani Yawi, aroro kanya matuyan tua, ay nu mafangesug di e fakatabuan.