Alubad. 116 - Fanawbuid tagsibaliwas Fakayabian

Alubad 116 Dius Tagfalangfe Taw siginans Fakabulun

¹ Kesug au Yawi, aroro nu naet au gubuk sa anya, gdungug tua angku.

² Kanya nadungug tua angku, nu katanya, kaduge kban gleleg, gdarangin au gugat sa anya.

³ Kalimu au ay gidapan gamatangan, aroro fakabulun munakbang angku, kata nu masiukan au.

⁴ Nu katanya, nauro au sas Yawi te, “Falangfei angku.”

⁵ Yawi tam Dius, masine, matuyan ay mafangafanyu.

⁶ Kanya gdiri tua at yud e fagmakatuun fag ngay taw. Gina au yud e fagsegun ya, kanya nafalangfe tua angku.

⁷ Yawi matuyan tua sa angku. Nu katanya, mafae fagmanabayanun ktua ku amatanganan.

⁸ Aroro kanya nafalangfe tua angku siginans fakabulun, fakabaluun, ay fagmamomuyun.

⁹ Nu katanya, kaduge kban ste sdaga, gbanwan ktua ban gugat sis Yawi.

¹⁰ Dewa au gugat glong te, “Maksvn wan nu gidapan au,” gafanud ktua gugat sa anya.

¹¹ Ay aroro siginan ku fagafanawaun, nalong au te, “Fagayu taw wa masine fagfatigwanan.”

¹² Nataw ban ku famangsi sas Yawi, sas fagayu at nafakamulun sa angku at masine?

¹³ Gfauseganan au Yawi, ay namon au ku fanggalangun at mauseganan sa anya, aroro nafalangfe tua angku.

¹⁴ Namafasludan au ku ngay fatuyanan sas Yawi sit ngay taw at daga salubangan.

¹⁵ Yawi maksvn nu kabalu at matuyan fag ngay taw nu nbul way.

¹⁶ Yawi, au wan am fagsuguan, ay anggan ku mina am fagsuguan yangay. Nafalangfe tuo angku siginan tagfagsuguan angku.

¹⁷ Gdarangin kban gugat sas Yawi, ay namon ku fanggalangun at mauseganan sa anya.

¹⁸ Ay namafasludan kban ku ngay fatuyanan sa anya sit ngay taw at daga salubangan,

¹⁹ sat bale at masine sis Erusalem. Segi Yawi!