Alubad. 115 - Fanawbuid tagsibaliwas Fakayabian

Alubad 115 Sadi way at Matuyan fag Dius

¹ Yawi, bunwa ami at masine kafauseganan, o tua aroro mafangesug tuo ay matuyan.

² Wain tibak talun at ngay taw fagfalingunun emi te, “Dada wan ay Dius?”

³ Dewa katanya, katatuy em famalus: Em Dius sis banwa, ay kanya gfakamulun at fakaylatun.

⁴ Kafag ngay taw at ngay fagsegan, taw way at nawat, at fangawat gintu ay salapi.

⁵ Kafag ngay fagsegan e bibig oma, ay wa maringang, ay e mata oma, ay wa glag.

⁶ Kanya e talinga oma, ay wa gdungug, e dungus oma, ay wa gayuk.

⁷ E ngay daluap oma, ay wa mated, ay e ngay darafa oma, ay wa malao, ay dewa e mirmir, wa maringang.

⁸ At nawat kafag ngay fagsegan ay fagayu tagseg, umkata kafag ngay fagsegan.

^9-10 Am fag ngay taw Israel, ay am fag ngay tagfon fanggalangun Arun at ngay kasugfunanan, afanudi sas Yawi! Kanya taggubuk ay tagdiri ayu.

¹¹ Ay am at ngay tagsuyu Yawi, afanudi yangay sa anya. Kanya taggubuk ay tagdiri ayu.

¹² Yawi di kalyam antam. Ay kanya ban gfon nusnge wain sa sangay taw Israel anggan sas Arun at ngay kasugfunanan.

¹³ Kanya gfasik mauseganan tua nusnga sinu fag taw tagsuyu anya, dewa ngay sisian ay ngay fagtainan.

¹⁴ Yawi ban nangus gfayu ayu, anggan ay ngay kasugfunanan.

¹⁵ Yawi gfon ban fia ayu nusnge wain, aroro kanya wan at nawat banwa ay daga.

¹⁶ Yawi tagagbilug banwa, ay nafatigwanan sa sangay taw fagdaul daga.

¹⁷ At kinbul fag ngay taw wa mafauseganan ya Yawi, aroro wa gleleg ya.

¹⁸ Itam way lang tagleleg at mafauseganan Yawi, katsi ay kabavn ban. Segi Yawi!