Alubad. 114 - Fanawbuid tagsibaliwas Fakayabian

Alubad 114 Alubad sabaliwa ngay Taw Israel nu Galin siginans Talun Igiptu

¹ Ebi ngay taw Israel, Akub at ngay kasugfunanan, nabanwan sis talun Igiptu, si sangay taw tagsaman at fangaringang.

² Ay gina kanya fagayu galoun siginans talun Igiptu, Dius nafili Uda laman at yud e malong fag talun, ay kanya nafagtainan talun Israel.

³ Ay gina kanya fagayu andasug sas Dagat Maraska, ankafud. Ay Liskung Urdan nragang nu gfamilugan kata sik taw takalimu.

⁴ Ngay fungsu ay buksul nauigan, kata ngay kambing ay ngay tupa nu gtudtulbuan.

⁵ Wain Dagat Maraska faginkafudun? Ay wain Liskung Urdan faginragangun nu gfamilugan?

⁶ Wain ngay fungsu ay ngay buksul fagnauiganun kata ngay kambing ay ngay tupa nu gtudtulbuan?

⁷ Siginan tam Fun Dius, Akub at Dius at daga salubangan, nangus fagdaul daga guigan.

⁸ Kanya nawat gang daul kata sik bunaw, ay kanya ansik bubun gfamilugan.