Alubad. 112 - Fanawbuid tagsibaliwas Fakayabian

Alubad 112 Mauseganan sik Taw Tagfaning tua Dius

¹ Segi Yawi! Mauseganan sik taw tagsuyu tua Yawi, ay taguseganan gfaning at ngay suguan.

² At ngay sisian ban gbabo tua nusnga nday, aroro Dius ggubuk tua at matuyan fag taw at ngay kasugfunanan.

³ Ay at ngay kalongan ban umramraman. Ay at fagmatuyanun ban katanya tua gugat.

⁴ Sik taw tagugali at matuyan, dewa sis fagmadulumun, si tua gugat anya fagmayamagun. Ay kanya kamon, ay mafangafanyu ay matuyan.

⁵ Gfon tua nusnge wain sa sik taw takamon, takamabedan ay at yud kamalingun.

⁶ Takatanya fag taw di ban e fagafanawaun, ay kamatang tua ban kabavn.

⁷ Kanya wa kalimu dewa at malimu fag barita, aroro gafanud tua sas Yawi.

⁸ Kanya wa kalimu ay wa galakayan, aroro saful way te, gbabo way ban at ngay fawayan.

⁹ Kanya kamon tua sat yud e kwa, ay at fagmatuyanun ban kamatang tua gugat. Ay at fagmakatuun ban kafamut yay, laman e gfauseganan.

¹⁰ Ay at mauri ban fag ngay taw lumag takatanya, ay gfaringgit ban at ngay bagang at kaksvnan nu kadotama, ay kata ban nu katinas at kaksvnan nu kapla. Ay at ngay algan ban wa kafasludan.