Alubad. 109 - Fanawbuid tagsibaliwas Fakayabian

Alubad 109 At ke Fagidapun fag Taw at Darangin

Laman sa tagfangguna alubad: Dabid at nariruk.

¹ Dius, gseg au emu. Lag o gfabayan angku,

² aroro takamuag ay at mauri fag ngay taw gfantabugan sa angku. Kanya fagayu glong at yud matuyan sabaliwa angku.

³ Kanya fagayu maligung si angku, ay fagayu at ngay nalong mauri, laman gfauri angku deyud au e malong.

⁴ Dewa ku fagadgalangan ay ku fagdaranginun fag ngay taw gfawayan way gugat angku.

⁵ Dewa au kesug anya fagayu ay nafakamulun at matuyan, at famangsi sa angku mauri way.

⁶ Kanya fagayu glong te, “Nanrvbvy tam sik taw at mauri at namabadbaboan anya. Ay e sik taw nangus taglong at yud matuyan sabaliwa anya sis tagwabilug at daga salubangan.

⁷ Ay nu nainsaful ro anya, tagwabilug ro nangus lumong te, ‘Sia at ke malong.’ Dius, foyungi yangay te, ‘Kanya dewa gdarangin, gasalanan yangay.’

⁸ Kanya nangus umbul wa vtv, ay at fanambagun fatigwanani wan sa tibak taw.

⁹ Ay at ngay sisian nangus umke yud e fagtainan, ay at mangena nangus umsik fagbubayun.

¹⁰ At ngay sisian ban nangus umsik ngay tagfangetan way lang nusnga nday, ay at bale ban nangus umkiklas wan, ay e gaiyan ban nangus anya fagayu sanya ginan.

¹¹ At fagbedanan ban nangus mul wan at ngay ramraman, ay at fagyudun toglag fag ngay taw nangus mul wan at ngay nainlufuyan.

¹² Lag nangus e kafanyu ya anya, ay katanya yangay anggan ban sat ngay sisian gina yud e mama ya.

¹³ At ngay kasugfunanan ban nangus kabul wan, laman ban at fadogan fag sugfun wa nasaful ya sabaliwa kafag ngay taw.

¹⁴ Yawi nangus gamatangan way ban gugat kafag taw at ngay mangaguyang at ngay asalanan. Ay kanya ban nangus wa kalyam anggan kafag taw at mina at ngay asalanan.

¹⁵ Ay at talanan ban nangus umkalyam siginans fagdaul daga.

¹⁶ Aroro kanya we namatangan sabaliwa nu kafanyu, abat ngate, kanya nafaurianan way ngay taw at yud e kwa, ay nafabul ngay tagayudan ay at yud e fagsegun ya.

¹⁷ Kanya kaylat gfauri at ngay iba. Nu katanya, faurii anya! Ay kanya we nagubuk tibak taw. Nu katanya, lag yangay o ggubuk anya!

¹⁸ Kabavn kanya gfauri at ngay iba, ay tagsi at amatanganan fagmauriun way gugat, kata nu gsulun gugat at lanbung. Nu katanya, sia way nangus at kumfaurianan sat fagmauriun kata sik mamam nu gfarios anya, ay kata sik langis takadasug anggan sat bini.

¹⁹ Ay at fagmauriun nangus wa kalyam ya siginan anya, ay kata sik lanbung ay sik famutus fagwan at fagsulunun gugat.”

²⁰ Yawi, fafasludani takatanya fag faurianan sa sangay taw tagfantabugan, ay taglong at mauri sabaliwa angku.

²¹ Yawi, ku Dius, gubuki angku laman gfauseganan ktua gugat emu. Ay falangfei angku aroro matuyan tuo ay mafangafanyu.

²² Aroro sik yud kway e kwa ay sik tagafalingunan, ay ku amatanganan masakit way kamomuy.

²³ Ku leleg gakalyamun wan, kata sik aninu takalyam nu nyabi, ay kata sik liung taglayug nu e nauig at fagafunan.

²⁴ Ku ngay tud malukme wan aroro kwa gfangon laman gdarangin, ay maksvn wan nu maniwang au.

²⁵ Ku ngay fawayan gfalingun angku, ay nu nalag angku gligbat.

²⁶ Yawi, ku Dius, gubuki ay falangfei angku, aroro mafangesug tuo,

²⁷ laman ku ngay fawayan sumaful te, o tua ku tagfalangfe.

²⁸ Dewa kanya fagayu gfauri angku, ggubuk tuo gugat angku. Ay dewa namaurianan angku, umkapla way. Nu katanya, au am fagsuguan guseganan ktua gugat.

²⁹ Ngay taw nangus tagfantabugan sa angku umkapla wan, ay at fakaplaun nangus gsifig anya kata nu at lanbung.

³⁰ Maksvn nu gfauseganan au Yawi sis fagngayuan taw.

³¹ Aroro kanya munakbang tua gugat sit yud e kwa fag ngay taw, laman gfalangfe anya fagayu siginan sangay taw taginsaful laman namabul.