Alubad. 107 - Fanawbuid tagsibaliwas Fakayabian

Alubad 107 Fauseganani Yawi aroro Sia wan Tagfalangfe

¹ Fauseganani Yawi, aroro kabavn matuyan, ay nu kesug di e fakatabuan.

² Am wan Yawi at nafalangfe. Nu katanya, longi te, “Kanya nafalangfe emi siginan em ngay fawayan.”

³ Aroro kanya nafaful ayu siginan tibak talun, siginans fakamenitan ay fakayabian, ay anggan siginans dua alvngvdan.

⁴ Ngay taw Israel ginkalyaman sit yud e taw fag talun, aroro wa saful dalan tagsat fagnamanwanan fag furuan.

⁵ Kanya fagayu anlunus ay andanum, ay arvs anbul wan.

⁶ Ay kanya fagayu nauro sas Yawi, ay kanya nafalangfe tua siginan at fagidapun.

⁷ Kanya nataban tua anya fagayu sat mataglayun fag dalan laman sat fagnamanwanan fag furuan.

⁸ Nu katanya, kanya nangus fagayu gfauseganan tua gugat Yawi, aroro nu kesug di gbadbalian, ay nafakamulun ngayuk madulo sa sangay taw.

⁹ Kanya nafainum tua takadanum ay nafon tua sa takalunus at mayayum fag ngay fakonun.

¹⁰ Tibak taw gidapan aroro masiukan salambitan, ay maubungan sit madulum fag fagubungan,

¹¹ aroro kanya fagayu nafamabo Tiba Tungud fag Dius, ay wa nafaning at ngay foyungan.

¹² Nu katanya, Dius nafafakamulun sa anya fagayu at maidap fag ngay fakamulun, ay kanya fagayu antaygilid, ay we ggubuk ya.

¹³ Ay kanya fagayu nauro sas Yawi, ay kanya nafalangfe tua siginan at fagidapun.

¹⁴ Ay kanya nagatvng wan ngay salambitan fansiuk kafag ngay taw, ay nafalfas siginan at madulum fag fagubungan.

¹⁵ Nu katanya, kanya nangus fagayu gfauseganan tua gugat Yawi, aroro nu kesug di gbadbalian, ay nafakamulun ngayuk madulo sa sangay taw.

¹⁶ Kanya naiklas wan sanbung fag sakbawan, ay nalifung yangay sanbung famalabag fagbanawanan.

¹⁷ Kanya fagayu we fagsafulun ay kamabo, ay gidapan aroro sat ngay asalanan ay sat fagmauriun.

¹⁸ Kanya fagayu wa kaylat ya gfangon ay gakabulun wan.

¹⁹ Ay kanya fagayu nauro sas Yawi, ay kanya nafalangfe tua siginan at fagidapun.

²⁰ Kanya naringang, ay kanya fagayu anfia, ay nafalangfe siginans fakabulun.

²¹ Nu katanya, kanya nangus fagayu gfauseganan tua gugat Yawi, aroro nu kesug di gbadbalian, ay nafakamulun ngayuk madulo sa sangay taw.

²² Kanya nangus fagayu gfon at ngay fanggalangun laman famauseganan Dius, ay galubad guseganan sabaliwa at ngay nafakamulun.

²³ Tibak taw si gugats sakayan lino, ay gfoyfolian gugat sas fagngabasadan dagat; kanya fagayu gfakamulun sis dagat laman e famul at ngay fagayudanun.

²⁴ Ay kanya fag ngay taw nalag yangay Yawi at ngay nafakamulun at madulo sis dagat.

²⁵ Dius nu nasugu, gfulug ay glugwak maksvn.

²⁶ Nu katanya, kanya fag ngay taw at sakayan lino kabat kata nu gdasug banwa, ay kababa kata nu gdasug sas bangsi dagat, ay kanya fagayu anlimu maksvn sat fagidapun.

²⁷ Kadugenya, kanya fagayu granranugan sit sakayan lino kata nu galangu, ay wa saful ya at fakamulun.

²⁸ Ay kanya fagayu nauro sas Yawi, ay kanya nafalangfe tua siginan at fagidapun.

²⁹ Yawi nafaragang nu gfulug ay nu glugwak.

³⁰ Ay nu nragang nu glugwak, kanya fagayu guseganan, ay Dius nadiri anya fagayu manabayan sat fakadasugan.

³¹ Nu katanya, kanya nangus fagayu gfauseganan tua gugat Yawi, aroro nu kesug di gbadbalian, ay gfakamulun ngayuk madulo sa sangay taw.

³² Kanya fagayu masine nu gfauseganan Dius, si sangay taw ay ngay fagtainan at daga salubangan.

³³ Yawi nafalanggang ngay liskung, ay kafag ngay liskung ankata sik talun at yud e taw, ay anggan ngay bulbug anlanggang yangay ay ankata at matat fag daga.

³⁴ Yawi gfae yud e kagutlu sit masine fag daga, aroro at ngay tagbanwan sanya maksvn nu mauri.

³⁵ Kanya mafae ngay bunaw sis talun at yud e taw, ay mafae ngay bulbug yangay anggan sat matat fag ngay daga.

³⁶ Ay Dius gfabanwan sanya takalunus fag ngay taw, ay kanya fagayu gfalindug sanya at furuan laman at fagbanwanan.

³⁷ Kanya fag ngay taw gtanum ngay ubas ay tiba yak fananumun, ay ngayu at gutluan.

³⁸ Dius nafon sa anya fagayu nusnga setaw, ay nafayu at ngay kasugfunanan. Ay ankayu yangay anggan at ngay fagbaugun.

³⁹ Gina kanya fag ngay taw anbuin, nafaplan, nafalingunan, nafaidapanan, ay anke fakabaluun,

⁴⁰ Dius nafae fakaplaun at ngay tagfangguna, ay naiyan anya fagayu ay nafalao sa sik yud e gbanwan ay yud e dalan fag talun.

⁴¹ Dewa katanya, Dius nagubuk tua gugat ngay taw tagidapan, ay nafayu tua at ngay kasugfunanan, kata ngay fagbaugun nu kayu.

⁴² Ay at matuyan fag ngay taw nu nalag takatanya, guseganan, dewa katanya at mauri fag ngay taw maragangan way lang.

⁴³ Ngay taw at ke fagsafulun gamatangan tua nangus gugat takatanya fagayu, ay gamatangan tua nangus gugat te, Dius mafangesug.