Alubad. 106 - Fanawbuid tagsibaliwas Fakayabian

Alubad 106 Dius at Fagmasineun sat ngay Taw

¹ Segi Yawi! Fauseganani Yawi, aroro kanya matuyan tua, ay nu mafangesug di e fakatabuan.

² Sinu nunda at malong at ngay nafakamulun at mabalyanan? We mafauseganan sa anya at kasakan.

³ Mauseganan sik taw nu gfakamulun tua gugat at matuyan ay at masine.

⁴ Yawi, amatangi yangay angku gina o ggubuk am nafili fag ngay taw, ay falangfei yangay angku gina o gfalangfe anya fagayu,

⁵ laman anggan au, kataip kyangay sam nafili fag ngay taw at fagmanabayanun, ay sat fagusegananun. Kaylat kyangay gfauseganan emu gfasfuan am nafili fag ngay taw.

⁶ Nafakamulun ami at mauri, ay anke asalanan ami sas Dius, kata em ngay mangaguyang.

⁷ Kanya fagayu, dewa yay sis talun Igiptu, wa gamatang ya Dius at nafakamulun fag ngay madulo. Ay nalyam yangay at ngay nafakamulun at masine, ay nafamabo anya sis Dagat Maraska.

⁸ Dewa katanya, kanya nafalangfe tua anya fagayu, laman gfauseganan anya, ay gfalag at fagmabalyananun.

⁹ Dius nalong sas Dagat Maraska te, “Fae dalani.” Ay kanya nafalao anya fagayu sanya fag dalan, dewa sas bangsi dagat, kata nu glao sis talun at yud e taw.

¹⁰ Kanya nafalangfe at ngay taw siginan at ngay fawayan.

¹¹ Ay at ngay fawayan anlubgub, ay we nlangfe ya.

¹² Nu katanya, at ngay taw nafanud sas Dius at ngay fatuyanan, ay galubad gfauseganan anya.

¹³ Dewa katanya, kanya fagayu masakit nalyam Dius at ngay nafakamulun, ay wa nafanya ya at ngay foyungan.

¹⁴ Gina kanya fagayu sis talun at yud e taw, nafaskud Dius, aroro maksvn nu gyaonun yamas.

¹⁵ Ay Dius nafon at fagetun, dewa katanya, nafadasug yangay sik fakasaitun, ay kanya fagayu anmomuy.

¹⁶ Gina sit fagmafulan, kanya fagayu nalabian Muisis ay Arun, aroro Yawi at tagfakamulun.

¹⁷ Nu katanya, daga ankarang sis day Datan ay Abiram, ay anggan sit ngay ibama. Ay kanya fagayu ntong sanya ay natabunan.

¹⁸ Ay ndasug yangay sik afuy sat ngay ibama, ay nafamin kafag ngay taw mauri.

¹⁹ Ngay taw Israel gina sis Buksul Sinay, nawat sik baka siginans gintu, ay naseg.

²⁰ Dewa Dius tua at mabalyanan, kanya fagayu natubus anya sa sik fagsegan takata sik baka takon way makmak.

^21-22 Kanya fagayu nalyam wan at tagfalangfe fag Dius, at nafakamulun fag ngay madulo sis talun Igiptu, sas Kam at kasugfunanan at talun, ay anggan gina sis day Dagat Maraska.

²³ Dius anke algan gfabul at ngay taw. Dewa katanya, at fagsuguan Muisis nafafanyuan sas Dius te, “Lag gfataglayun am dotama. Lag gfabul.”

²⁴ Kanya fagayu wa naylat Dius at nafon fag daga, dewa masine, aroro wa gafanud sas Dius at fatuyanan.

²⁵ Ay gina kanya fagayu sit mesa bale ramit, kanya nafamayud, ay wa nafaning Yawi.

²⁶ Nu katanya, Dius glong te, “Gfabul kban ku ngay taw sis talun at yud e taw,

²⁷ ay namasaruayan kban at ngay kasugfunanan sa sangay talun, ay sanya waban nu kabul.”

²⁸ Kanya fagayu nanangalo nanseg Baal fag fagsegan sas Peur, ay kanya fagayu naon yangay ngay fon laman sa sangay kinbul.

²⁹ Kanya fagayu nafadotama Dius siginan takatanya at nafakamulun, nu katanya, andasug sa anya fagayu sik faurianan maksvn.

³⁰ Dewa katanya, Finekas nadarangin sas Yawi ay kafag faurianan anragang wan.

³¹ Aroro siginans Finekas at nafakamulun takatanya, Dius natap anya te, kata nu yud e asalanan, ay kabavn ngay taw wa kalyam Finekas at nafakamulun.

³² Ngay taw Israel gina sis bulbug Meriba nafauri Yawi, nu katanya, sik fagmauriun andasug sas Muisis aroro siginan kafag ngay taw.

³³ Kanya fagayu nafadotama Muisis, ay kanya nalong at yud matuyan.

³⁴ Ngay taw Israel wa nafabul ngay taw Kanaan, kata Yawi at suguan.

³⁵ Abat ngate, kanya fagayu nafagadgalangan way ay nafaning at ngay ugali.

³⁶ Kanya fagayu gseg tibak fagsegan, kata nu ntong sa sik lusung; siginan takatanya, anke fagmauriun.

³⁷ Kanya fagayu nafon at ngay sisian sat mauri fag falad laman at fanggalangun.

³⁸ Kanya fagayu nafasik masuya at talun, siginan nu gfabul at ngay sisian dewa yud e asalanan, laman at fon sa sangay taw Kanaan at ngay fagsegan.

³⁹ Siginan at nafakamulun takatanya, nafasuya wan anggan at ngay sadili. Ay natalyuyan Dius, kata sik mangena at nanangalo sa tibak mangama.

⁴⁰ Nu katanya, Yawi andotama at fakesugun fag ngay taw. Ay kafag ngay taw ansik mauri sa anya.

⁴¹ Nu katanya, kanya nafababawan anya fagayu sa tibak talun at ngay taw. Ay at ngay fawayan nafagtainan anya fagayu.

⁴² Ay at ngay fawayan nafaidapan ay nafagsuguan anya fagayu.

⁴³ Dius ngayu ginan oma gfalangfe ngay taw Israel, dewa katanya, kanya fagayu kamabo yay gugat. Nu katanya, at ngay asalanan ankaksvn.

⁴⁴ Dewa katanya, kanya fagayu nu nadarangin, Dius nadungug tua, ay anfanyu at ngay taw nu gidapan.

⁴⁵ Ay Dius namatang at nasadian sat ngay taw, ay siginan nu mafangesug, di nafataglayun nu kadotama at ngay taw.

⁴⁶ Dius nafamatangan ngay fawayan at nafagsuguan ngay taw Israel laman kanya fagayu kafanyu tua.

⁴⁷ Yawi em Dius, falangfei emi! Ay fafuli emi sa em talun, siginan em fagafagsuguanan fag ngay talun, laman manamauseganan ami emu, aroro matuyan tuo.

⁴⁸ Kabavn segi Yawi, ngay taw Israel at Dius. Fagayu taw longi te, “Anud!” Segi Yawi!