Alubad. 105 - Fanawbuid tagsibaliwas Fakayabian

Alubad 105 Dius ay at ngay Taw

¹ Fauseganani Yawi ay segi anya. Ay foyungi yangay sa tibak talun at ngay taw at ngay nafakamulun.

² Alubadi fauseganani anya, ay longi at ngay nafakamulun at madulo.

³ Segi anya, tam Dius at yud e malong. Fagayu am at kinkakbang sas Yawi, useganani tua.

⁴ Akbangi sas Yawi, ay afanudi te, siginan tua anya fagmabitsugun, ay masadii tua gugat sa anya.

^5-6 Am, Dius at ngay nafili, ay Abrayam, Dius at fagsuguan, at ngay kasugfunanan, ay Akub yangay am at ngay kasugfunanan. Amatangi tua gugat Dius at ngay nafakamulun at madulo, ay at ngay balyawvtan.

⁷ Sia wan Yawi tam Dius, ay kanya wan fagdaul daga at fun.

⁸ Kanya di kalyam at nasadian, at nafatuyanan laman sas fagayu kasugfunanan,

⁹ at nasadian sas Abrayam, ay sas Isak.

¹⁰ Ay nafatuyan yangay sas Akub, ay anggan sat ngay kasugfunanan te, at nasadian ban gfataglayun tua kabavn.

¹¹ Kanya nalong sas galay at sadi te, “Gfon kban sa ayu ay sa ay ngay kasugfunanan talun Kanaan. Kanya ban fag talun ku fagnamagbilugun sa ayu.”

¹² Dius nalong takatanya sa anya fagayu, gina kanya fagayu yay yud ngayu, ay sik ngay betaw sis talun Kanaan.

¹³ Kanya fagayu gadgalinan sa tiba tibak talun.

¹⁴ Dewa katanya, Dius di naylat kanya fagayu nu gafagsuguanan. Nu katanya, kanya nafaurianan ngay fun, laman ngay taw Israel manabayan.

¹⁵ Kanya nalong sa kafag ngay fun te, “Lag am gfaurianan ku nafili fag ngay taw ay ku ngay taglong.”

¹⁶ Dius nafadasug sik maksvn fag fanlunus sas talun Kanaan, ay we kaon ya.

¹⁷ Dewa katanya, Dius nafaguna wan Use sas talun Igiptu, laman sik fagsuguan.

¹⁸ Ay gina gbuba anya sas Igiptu, at bitis masiukan salambitan, ay at liug masiukan sanbung.

¹⁹ Yawi nafaskud Use. Sanya ginan, anfasludan at ngay nalong sa anya.

²⁰ Igiptu at fun, tagfagtainan ngayu ktalun, nafalfas anya.

²¹ Ay nafili Use laman tagfangguna sit bale daul ay tagalaga at ngay ramraman.

²² Nu katanya, kanya e fagmabalyananun gfoyung sas fun at ngay tagfangguna.

²³ Akub fag talanan nasas Igiptu, sa sangay taw Kam at talun, ay kanya fagayu gbanwan sanya.

²⁴ Yawi nafayu at nafili fag ngay taw, ay nafasik mabalyanan gtungud yay ngay taw Igiptu.

²⁵ Ay kanya naylat ngay taw Igiptu nu kauri ay nu kamuag sat nafili fag ngay taw.

²⁶ Kanya nasugu at taglong Muisis ay at filian Arun.

²⁷ Kanya fag dua nafalag sa sangay taw Igiptu Dius at ngay fakamulun at madulo.

²⁸ Dius nafadulum sis talun Igiptu, dewa katanya, ngay taw Igiptu wa nafaning Dius at ngay foyungan.

²⁹ Ay siginan Dius at longan, talun Igiptu at mamam ansik taguk; nu katanya at ngay albon anbul.

³⁰ Ay ankayu at fio sanya fag talun, ay gliptuk nusnga nday, ay nasakbo anggan sas fun at bale.

³¹ Ay kanya nafadasug yangay sanya fag talun ngay lango ay ngay bangyus.

³² Abat ngate arak at kindasug sanya fag talun, at nafadasug yelu fag arak takadaul ngay gang ayu sirut, gasfuan ngay limbad.

³³ Kanya narasras at ngay fananumun fag ngay wat ubas, ngay fun kayu igus ay tiba yak fun kayu.

³⁴ Ay kanya nafadasug sa kafag talun ngayuk liung yud katap ya.

³⁵ Ay kafag ngay liung naon fagayu at tanum anggan at ngay rawvg.

³⁶ Ay Dius nafabul ngay taw Igiptu at ngay baguama tiba kaka, sas galay sik talanan.

³⁷ Nu ntabu takatanya, Dius nafalfas fagayu gaban taw Israel siginans talun Igiptu manabayan, ay e buba yay salapi ay gintu.

³⁸ Gina ngay taw Israel nalao, ngay taw Igiptu guseganan, aroro maksvn nu kalimu ngay taw Israel.

³⁹ Kaduge kanya fagayu glao swa menit, Dius gfae linyabu laman taglanbung, ay galay yabi gfae afuy laman at salung.

⁴⁰ Ngay taw Israel nu naet fakonun, Dius nafon sik ngay fugu ay tinapay, ay nafapsug anya fagayu.

⁴¹ Ay kanya nabaltak gang, ay anke mamam ay nafamilugan, ay ansik liskung sat matat fag daga.

⁴² Dius nafakamulun takatanya, aroro gamatang at fatuyanan sat fagsuguan Abrayam.

⁴³ Kanya nafaduksun at nafili fag ngay taw siginans Igiptu, ay kanya fagayu guro guseganan.

⁴⁴ Ay kanya nafon sa anya tibak gaban taw at talun. Nu katanya, Israel nagbilug tibak taw at nainlufuyan.

⁴⁵ Dius nafakamulun takatanya, laman at ngay taw gfaning at ngay foyungan ay at suguan. Segi Yawi!