Alubad. 104 - Fanawbuid tagsibaliwas Fakayabian

Alubad 104 Fagusegananun sas Dius aroro Sia wan Takawat

¹ Gfauseganan au Yawi. Yawi ku Dius, mabalyanan tuo. Am fagmabalyananun ay am fagmasineun, kanya wan tuga am lanbung.

² Yamag gsifig emu kata am lanbung, ay nawat o banwa laman am fagbanwanan.

³ Nawat o am fagbanwanan sis tungud kiwang. Ay nawat o linyabu tagbuba emu kata sik sakayan, ay tagmara kata nu am dalan.

⁴ Nawat o tagmara am tagfadasug barita, ay ngay limbad am fagsuguan.

⁵ Nafatungkud o fagdaul daga sit mogat fag fagtungkudan, nu katanya, di ban kauig kabavn.

⁶ Nawat o sik tagbia fag lino kata sik ramit laman fansifig fagdaul daga, ay dewa ngay buksul kalubgub wan.

⁷ Nu naringang o kata sik lingsi laman gsalag, kafag mamam nalyam wa vtv.

⁸ Ngay buksul kabat ay ngay datag kababa, kata am algan.

⁹ Nafae tigyangan o dagat, laman wa gdog ya kalino sas fagdaul daga.

¹⁰ Nafae ngay bulbug o sa sangay datag, ay mamam gfamilugan sa sangay buknga buksul.

¹¹ Nu katanya, fagayu mangilafang sisad araw, anggan at mela fag ngay asnu e fanginum tua.

¹² Ngay manuk tungud gfugad ay guni si sangay kayu at ngay sanga, munakbang sanya fag ngay liskung.

¹³ Siginan am fagbanwanan sbanwa, gfarak o sa sangay buksul. Ay siginan am nafakamulun, nafae ngay fagmasineun o sas fagdaul daga.

¹⁴ Nafatugbung o ngay makmak laman ngay mangilafang at fakonun, ay nafatugbung yangay o ngay tanum laman sa sangay taw. Nu katanya, ngay taw at fakonun siginan yangay sdaga.

¹⁵ Ay kafag ngay taw anke fanginum at malangu laman gfae fagmanabayanun, ay anke langis laman famasine at kamatan, ay anke tinapay tagfabitsug anya fagayu.

¹⁶ Ay mamam nafamilugan yangay anggan sa am fagagbilugun fag ngay kayu, at masuad, am natanum fag ngay kayu sidru sis Lebanun.

¹⁷ Ngay manuk tungud gfugad sanya, ay ngay kalaw gfugad si sangay kayu tangabat.

¹⁸ At mela fag ngay kambing gbanwan si sangay buksul tangabat, ay ngay siang manabayan gbanwan sis wa gang.

¹⁹ Nawat o magdanun laman fagsafulan ngay buknga, ay menit kafalyu sim nafalganan fag buknga.

²⁰ Gfae dulum o, laman e yabi, ay ginanya ngay mangilafang gfanloan sisad araw.

²¹ Ngay liun gsubang kaduge grvbvy Dius at nafalganan sa anya fag fakonun.

²² Ay galay balabag, kanya fagayu kafoli wan sat fagtiugan laman nanfiangalay.

²³ Ngay taw gkoko, ay gfakamulun anggan anyabi.

²⁴ Yawi, ngayu am nawat! Nawat o kanya fagayu siginan am fagsafulun, ay ankapnu sas fagdaul daga.

²⁵ Dagat gbia tua, ay ngayu am nawat tagleleg sanya ay di e mafatap, e gbia ay e alay.

²⁶ Ay sanya ngay sakayan lino gfoyfolian. Ay sanya yangay am awatan Libyatan nu gawean.

²⁷ Ay am ngay awatan tagleleg nu kalunus way, gfanya way lang tagsiginan emu fag ngay fakonun.

²⁸ Gfon o ngay fakonun, ay kanya fagayu kon ay kapsug.

²⁹ Ay nu natalyuyan o anya fagayu, maksvn nu gafanawa. Ay nu nabul o at engasan, kanya fagayu kabul wan ay kafoli sas daga.

³⁰ Am ngay awatan kaawat gina o gfadasug am engasan. Nu katanya, gfabagu o fagdaul daga.

³¹ Yawi, am fagmasineun ban nangus katanya tua gugat. Ay guseganan tua ban o nangus gugat am ngay awatan.

³² Nu nadama o fagdaul daga, kae faleleg, ay nu nated o ngay buksul, kae anus.

³³ Kaduge kban gleleg, galubad au sas Yawi, ay kaduge kban gengasan, gfauseganan au anya.

³⁴ Kanya nangus guseganan tua tagsi ku amatanganan. Ay e fagusegananun ktua ban gugat siginans Yawi.

³⁵ Ngay taw nangus at mauri kalyam wan siginans fagdaul daga. Gfauseganan au Yawi. Nafatuyanan au te, gseg kban gugat anya. Segi Yawi!