Alubad. 102 - Fanawbuid tagsibaliwas Fakayabian

Alubad 102 At ke Fagagwantanun fag Taw at Darangin

Nu gfoyung at ngay fagidapun sas Yawi.

¹ Yawi, dungugi ku darangin, ay balusi angku nu get au sa emu gubuk.

² Lag nangus gsuksuan angku gina au e fagidapun; abat ngate, dungugi ay balusi angku masakit.

³ Aroro ku leleg gakalyamun wan kata sik anus, ay ku bilug masugba kata nu kairug.

⁴ Kata au sik makmak at kinlangke wan. Ay kwa kaylat ya gfangon,

⁵ ay gfandeng au maksvn, ay maniwang kway lang.

⁶ Kata au sik mela fag manuk tungud tagsis talun at yud e taw, ay kata kyangay sik liaw si sik bale dan.

⁷ Kwa katiug; kata au sik manuk tungud tagsadilian si sik tungud bale.

⁸ Fagayu menit ku ngay fawayan kase gugat angku. Ngay taw glong ku ngayan laman gfalingun angku.

⁹ Kwa gfangon ya, abat ngate, malunggung au gwayway sisad dafug, ay ku liasun ganting ay ansuglat sa ku fanginum.

¹⁰ Maksvn nu kauri o angku, nu katanya nafuyut o ay naukas angku.

¹¹ Ku leleg kalyam way kata sik aninu nu kalyam galay sfafun, ay kata sik makmak takagong.

¹² Yawi, dewa katanya gfunan tua ban o kabavn, ay fagayu ban talad taw gtoglag tua emu.

¹³ Nasaful au te, namakamulun o laman namalangfe furuan Siun. Ay katsi andasug wan at buknga laman gfalag o am fakafanyun.

¹⁴ Yawi, ami am nafili fag ngay fagsuguan kesug tuami am furuan Siun, ay kesug yangay mi anggan at ngay alad gang at kinkiklas wan ay at lukbu.

¹⁵ Ngay talun ban at ngay taw umlimu Yawi. Ay fagayu ban ngay fun sas fagdaul daga gsuyu sat fagmabalyananun.

¹⁶ Aroro Yawi ban gdog yay namalindug furuan Siun, ay namasure at fagmasineun.

¹⁷ Ay ginanya ban, kanya gbalus tagidapan fag ngay taw at darangin, ay di ban gaiyan.

¹⁸ Riruki takatanya fagayu laman sat fadogan fag ngay kasugfunanan, laman ban anggan at yud yay ansalug gseg tua Yawi.

¹⁹ Siginan at fagbanwanan sbanwa at yud e malong, Yawi gdama fagayu tagsis fagdaul daga,

²⁰ laman gdungugan at maubungan fag ngay taw nu guro aroro gidapan, ay laman namalfas at maubungan at fagnamabulun wan.

²¹ Nu katanya, ngay taw ban gkamatoan sabaliwa Yawi at nafakamulun sas furuan Siun, ay ngay taw ban gseg anya sas furuan Erusalem.

²² Ay anggan ban ngay taw tagsiginan tibak talun ay fagayu fagfagtainanan gseg yangay Yawi.

²³ Yawi nafamomuy angku gina au mabaguama, ay nafagud ku leleg.

²⁴ Ay nalong au te, “Ku Dius, lag yap gbul ku leleg, aroro mabaguama kyay. Gleleg tuo kabavn,

²⁵ ay nawat o banwa ay daga.

²⁶ O ban katanya tuo gugat. Dewa katanya, tuy ban fagayu kalyam way, ay karasras kata sik lanbung, ay gtubus ban o kata yangay sik lanbung.

²⁷ Di ban o ginbalian, ay di ban o e fakatabuan.

²⁸ Ami wan am nafili fag ngay fagsuguan. Nu katanya, manabayan tua ban ay ngaduge em ngay kasugfunanan nu gbanwan, aroro gdiri tua ban o gugat.”