Agay 2 - Fanawbuid tagsibaliwas Fakayabian

Yawi at Bale at Kasinean

^1-2 Ay gina sis faduak safulu e sadik menit sis fafituk magdanun ginanya yangay fag banwa, Yawi nasugu at taglong Agay laman nanlong sas Serubabel, ay sas Uswe, ay anggan sas fagayu taw Israel at kinfoli sas talun Israel te,

³ “Sinu am at nalag ku bale taguna at kasinean? Nu gfaladlabian am ku bale katsi ay ebi, inday at masine nu mawatan? O ay malong yangay am te, katsi wa vtv kasine ya?

⁴ Ay dewa katanya, faksvni tua ay ngay amatanganan! Fataglayuni nu kawat am ku bale aroro gufud ktua gugat ayu. Au, Yawi at Mabalyanan, taglong tuy.

⁵ Katanya yangay ku nafatuyanan ebi sa ay ngay mangaguyang gina au gfalfas anya fagayu siginans talun Igiptu. Nu katanya, lag am kalimu aroro gufud ktua ban gugat ayu.”

⁶ Yawi at Mabalyanan glong te, “Wa ban glugo ya, gdog kyay ban nanguig banwa ay fagdaul daga, ay dagat,

⁷ ay anggan fagayu talun, ay kanya ban fag ngay talun at taw namuba at ngay ramraman sa ku bale. Ay umkapnu ban sa ku bale nusnge wain at mafanud.

⁸ Aroro au tagagbilug ngay gintu ay ngay salapi.

⁹ Katsi, ku bale ban amasine yap tua ebi taguna. Nu katanya, namae fagmanabayanun kban tuy fag furuan daul. Au, Yawi at Mabalyanan, taglong tuy.”

Yawi at Fatuyanan fag Famonun

¹⁰ Gina sis faduak safulu e ufatk menit sis fasiamk magdanun sis faduak banwa fun Daryu nu gfunan, Yawi nalong sat taglong Agay te,

¹¹ “Nanginto o sa sangay tagfon fanggalangun te, setain tam faugali sabaliwa takatatuy?

¹² Kata nangus sik taw at ke buba at mafasamanan fag yamas masifigan sit lanbung, ay at lanbung nu natayuk sas tinapay, ay sas gulay, ay sas fanginum, ay sas langis, ay sas nusnga setaw fag fakonun, o tuy ro manga fagayu umkata yangay kafag yamas at mafasamanan?” Ay kafag ngay tagfon fanggalangun gbalus te, “Duan.”

¹³ Ay Agay nainto te, “O sik taw at masuya aroro nated sik taw at kinbul ay kanya nu natayuk kafag ngay fakonun, o kanya ro fag ngay fakonun masuya yangay?” Ay kafag ngay tagfon fanggalangun gbalus te, “Sabv.”

¹⁴ Agay glong te, “Yawi gfatuyan te, katanya yangay ngay taw Israel at fakamulun ebi, mauri way nusnga setaw at fakamulun ay masuya way at ngay fanggalangun sas Yawi.

¹⁵ Amatangani fia at ngay kindasug sa ayu gina am yud nawat Yawi at bale.

¹⁶ Aroro ebi, gina am nalo sa ay ngay fafulan trigu, gseg am te, dua tua ro ksafuluk tasan ay gutluan, dewa katanya, safulu wayk tasan. Ay gina am nalo sa ay fagturisan rawvg ubas gseg am te, lima ro ksafuluk baringan ay fagmafapnuun, dewa katanya, dua way mangaro ksafuluk baringan.

¹⁷ Yawi nafayango ay ngay fananumun siginan at masugba fag tagmara, ay siginan nusnga setaw takon fananumun, ay siginan nu gfarak yelu kadaul ngay gang ayu sirut, dewa katanya, yam kafoli sa anya.

¹⁸ Gina sis faduak safulu e ufatk menit sis fasiamk magdanun, antabu wan nu kawat Yawi at bale at fagfatungkudan turuk. Siginan katsi fag menit, damai takafasludan.

¹⁹ Ngay trigu ban dewa namin wan, ay dewa ban yud grawvg ya ngay tanum ubas, ay ngay fun kayu igus, pumigranata, ay ulibu, Yawi ban gfon tua gugat ayu nusnge wain.”

Yawi at Fatuyanan sas Serubabel

²⁰ Ay ginanya yangay fag menit, Yawi gdog yay nalong sas Agay te,

²¹ “Nanlong o sas Serubabel te, nanguig kban banwa ay fagdaul daga.

²² Nangiklas kban at ngay fagfagtainanan ay nama yud kban e tungkul at ngay fagmabalyananun. Namadaging kban at ngay faguyudan ay anggan tagsakay. At ngay kabayu ban umbul, ay at ngay tagsakay ban gfadfabulan.

²³ Ay nanlong yangay o sa ku fagsuguan Serubabel te, ‘Ginanya ban fag menit, gfon au sa emu ku fagmabalyananun aroro o wan ku nafili.’ Au, Yawi at Mabalyanan, taglong tuy.”