Abakuk 3 - Fanawbuid tagsibaliwas Fakayabian

Abakuk at Darangin

¹ Katatuy Abakuk at darangin.

² “Yawi, nadungug au sabaliwa am ngay nafakamulun, ay andulo au maksvn. Fakamuluni yangay sa emi kata ebi am nafakamulun. Ay gina ban o gfalag am dotama, afanyui tua emi.

³ O wan at yud e malong fag Dius takadasug siginans Teman ay buksul Paran. Am fagmasuloun anfagdaul banwa, nu katanya, fagayu taw sas fagdaul daga, sumeg emu.

⁴ Ay kadasug o kata menit nu kasure, ay e yamag siginan am daluap nu inda am fagmabalyananun nu masuksukan.

⁵ Kadasug o gbuba ngay faurianan.

⁶ Ay nu nlindug o, fagdaul daga guigan, ay nu nadama o, ngay talun gtadtaruyan kalimu, ay taguna fag ngay buksul kabaras. Ay am ngay balyawvtan di gbadbalian kabavn.

⁷ Ay nalag au ngay bale ramit nu marasrasan sis Kusan ay sis Midyan.

^8-9 Yawi, kata o sik tagfawayan gsakay sis kabayu at faguyudan tagbabo gina e awayan, ay at mafalganan gfana. Dewa katanya, sinu am fakadotamaun? O ngay liskung ay dagat? Siginan sangay liskung, nafae fagfamiluganan o mamam.

¹⁰ Ngay buksul nu nalag emu, gtadtaruyan kalimu. Nu narak maksvn, dagat glugwak ay gbia nu kalung.

¹¹ Gina am ngay banyas ay am bangko taganinag glayugan, menit ay magdanun anragang.

¹² Aroro kadotama o maksvn, fagdaul daga ay fagayu talun anrasras wan.

¹³ Siginan takatanya, nafalangfe o am nafili fag ngay taw, ay at mauri fag talun at tagfangguna nafabul wo, anggan at fagfanggunaun fag ngay taw.

¹⁴ Nasuluy o kafag tagfangguna at alfuyu at sadili bangko. Nafakamulun o takatanya gina at ngay tagfawayan gfawayan emi. Kanya fagayu kata sik fulug nafarapyag emi. Kanya fagayu guseganan namamin emi fag ngay afanyuan tagsuksuan aroro kalimu ami.

¹⁵ Kata o sik tagfawayan tagsakay sis kabayu at faguyudan ay nu nasiad o dagat, lugwak anbia.”

¹⁶ Abakuk nalong te, “Nu nadungug au takatanya, fagdaul ku bilug ay anggan ku bibig gtadtaruyan aroro anlimu au maksvn, ay ku ngay tud anlukme. Dewa katanya, gagwantan au gfanya Yawi at nafalganan fag menit nu namauri em ngay fawayan.

¹⁷ At ngay tanum wat ubas, igus ay ulibu, deyud grawvg ya, ay anggan at ngay fagbaugun dewa anbul wan sit ngay fagubungan,

¹⁸ guseganan au aroro ku tagfalangfe Fun Dius Yawi tua.

¹⁹ Kanya gfabitsug angku, ay gfabitsug ku darafa kata arasyo, laman maundaud au sa tangabat fag buksul.”