Abakuk 2 - Fanawbuid tagsibaliwas Fakayabian

¹ Abakuk nalong te, “Nanmalindug au sas fagulitan fag afud furuan at alad, ay namanya au Yawi at fagyalongun sa angku ay at famalus ku fagetun.”

Dius at Famalus sas Abakuk

² Katatuy Yawi at famalus: “Riruki sas gang ku fagnanlongun emu fag foyungan laman mayamag ay masakit nu katap.

³ Riruki yap lang aroro ya ndasug at buknga nu kafasludan, dewa ban glugo yay, fanyai yap, aroro matuyan umfasludan ban.

⁴ “Katatuy am fagnanrirukun: Damai. Takamatungudun fag ngay taw wa matuyan at ngay fakamulun. Dewa katanya, matuyan fag taw gleleg tua, aroro sat fagafanudun.

⁵ At matuyan, ngay ramraman wa mafanud. Ay fagayu taw takamatungudun ay tagfangalabian ramraman, kabavn gafanawa ay we fagmanabayanun. Kanya fagayu kata way sik takamabul yud kagwanta. Nu katanya, kanya fagayu gfangagbilug ngay talun.

⁶ “Dewa katanya, kanya ban fag ngay talun at ngay taw namalingun anya glong te, ‘Afanyuan am, tagbul deyud ay fagagbilugun, ay tagfandaya laman kae ramraman am. Seduge tua ban nunda nu gfakamulun am takatanya?’

⁷ Dewa katanya, ay nataban ban fag ngay talun namasud sa ayu kata ay nafakamulun sa anya, ay abandi ban am man tagtadtaruyan kalimu, ay tagagbilugan ay ngay ramraman.

⁸ Aroro ngayu wan ay nagbilug ramraman siginan kafag ngay talun, kanya ban fag ngay talun at ngay taw at sawad nangagbilug ay ramraman. Umfasludan sa ayu takatanya aroro nafabul am ngay taw ay nafauri at ngay tanum anggan at ngay furuan.

⁹ Ida am, takawat ay ngay bale siginan ay nabul fag ngay salapi sat mauri fag ngay balyawvtan. Nafaksvn am ay ngay bale laman ban malangfe am nu ndasug faurianan.

¹⁰ Aroro nafabul am ngayuk taw, e gfabul yangay ban ayu ay e nangiklas ay ngay bale.

¹¹ Ngay alad ban, ay kafag bale at bakban, kata sik taw taget gubuk, aroro kafag bale kaiklas wan.

¹² Ida am, takawat sik furuan daul siginan ay fagmauriun, siginan nu kamabul am ngay taw, laman ay famawat kafag furuan.

¹³ Dewa katanya, ay nataban fag ngay taw at nawat fag ngay bale, kairug way ban, nu katanya, wa ban e masuad ay ngay nainlufuyan. Yawi at Mabalyanan at nafalganan takatanya.

¹⁴ Aroro nu setain mamam nu mapnu sis dagat, umkayu yangay ngay taw at fagsafulun sabaliwas Yawi at fagmabalyananun.

¹⁵ Ida am! Aroro nafae fakaplaun am ay fakbangan fag ngay talun. Kata nu nafalangu am anya laman lumag am nu malulasan.

¹⁶ Nu katanya, am man ban takapla, aroro Yawi gfaurianan yangay ban ayu. Ay gfainum yangay ayu sit taya at fandotaman laman nu nalangu am, kalag nu malulasan am, ay umke fakaplaun am.

¹⁷ Nafuan am ngay kayu sis Lebanun, nu katanya, anbul wan tagsanya fag ngay mangilafang. Nu katanya, am man katsi at fagfauriun, ay umlimu am maksvn. Matuyan, umfasludan sa ayu takatanya, aroro nafabul am ngay taw, ay nafauri at ngay daga ay at ngay furuan.

¹⁸ Nataw ngay fagsegan at fanambagun? Kanya fagayu taw way at nawat siginan sik ngay kayu ay wa maringang.

¹⁹ Afanyuan am, tagdarangin sa sangay fagsegan te, ‘Mafuloani ay gubuki emi.’ At matuyan, kanya wa mafoyung ayu. Kanya fagayu dewa masifigan gintu ay salapi, wa gleleg.

²⁰ Dewa katanya, Yawi gbanwan sit bale at yud e malong. Nu katanya, fagayu taw sas fagdaul daga maragangani sit daga salubangan.”