2 Tesalunika 3 - Fanawbuid tagsibaliwas Fakayabian

Pablu Get te, Darangini Emi

¹ Ay katsi, em ngay faduksay, get ami sa ayu te, darangini emi, laman tam Fun at longan masakit nu kafagdaul, ay laman e gseg yay ban kata ayu.

² Darangini yangay emi laman umlangfe ami siginan sangay taw at mauri, aroro bunwa fagayu taw tagafanud.

³ Tam Fun matuyan. Kanya tagfaksvn ay tagdiri ayu siginan at mauri.

⁴ Maksvn nu gafanud ami sa tam Fun sabaliwa ayu te, galo am ay gfataglayun am gfaning em ngay suguan.

⁵ Tam Fun tagfamatangan ayu laman ay ugali kata tua Dius nu kesug, ay kata tam Fun Isus nu mabakvd.

Sabaliwa at Momuy fag ngay Taw

⁶ Em ngay faduksay, siginan tam Fun Isus at fagmabalyananun gsugu ami ayu te, saruyani at momuy ay at yud kaylat gfaning em ngay foyungan.

⁷ Am wan at nasaful em fakamulun, at masine fag fagulitan. Gina ami gfaudgufudan ayu, dimi kamamomuyun.

⁸ Wami gbul nusnge wain fag fakonun nusnga ndaginan fag taw nu dway mi nabayad. Gugatan tuami gfakamulun kayu menit ay yabi laman dimi gfaidapan nusnga sinu si ayu.

⁹ Em fagfakamulunun katanya bunwa at masuad te, wami masine gbul ay fakonun, nu bunway laman gfalag ami sa ayu ay fagfaningun.

¹⁰ Gina ami sanya, nasugu ami sa ayu te, lag gfafangon at yud kaylat gfakamulun.

¹¹ Aroro nadungug ami te, tibak taw sanya kamamomuyun ay wa kaylat gfakamulun, abat ngate, namasaysalagan way at iba.

¹² Siginan tam Fun Isus at fagmabalyananun, maksvn em suguan sanya fag ngay taw te, manabayani tua nu gugali, ay fakamuluni tua laman e fakonun.

¹³ Em ngay faduksay, lag am kalufuy gfakamulun at masine.

¹⁴ Ay nusnga sinu at yud kaylat gfaning em ngay suguan, aiyani wan anya laman umkapla.

¹⁵ Dewa katanya, lag am gfangayan anya te, ay fawayan, nu bunway famatangi anya aroro kanya ay faduksay.

Fakatabuan at Longan

¹⁶ Tam Fun wan bulbug fagmanabayanun ay kanya nangus gfon gugat sa ayu fagmanabayanun. Ay kanya nangus gufud tua gugat ayu.

¹⁷ Au Pablu, at nariruk tuy. Katatuy fag rirukan tagfatoglag te, au at ke rirukan.

¹⁸ Tam Fun Isus at fagmagalangun sumawa nangus ayu fagayu.