2 Tesalunika 2 - Fanawbuid tagsibaliwas Fakayabian

Takamabo fag Taw

¹ Ay nu sabaliwa tam Fun Isus nu kafoli, ay nu gfaful antam laman nansalubang tam anya, maksvn nu glong ami sa ayu, em ngay faduksay te,

² lag am vtv gafanawa ay lag am kalimu, dewa e sik foyungan siginan unu sik falad at longan, ay dewa e gbarita, ay dewa e sik rirukan andasug siginan unu emi te, “Tam Fun at menit andasug wan.”

³ Lag am gadayan nusnga sinu fag taw at foyungan, aroro ya kadasug kanya fag menit yakmay e gfawayan Dius, ay yakmay ban andasug at mauri fag taw tagafaurianan ban kabavn.

⁴ Kanya ban kamatungudun sas fagayu fagsegan, ay gsakbo sas Dius at bale ay malunggung sanya ay gfoyung te, “Au wan Dius.”

⁵ O yam namatang ku longan gugat ayu gina kyay sanya gfaudgufudan ayu sabaliwa kafag takamabo?

⁶ Saful wam tagfatawad anya katsi. Ay ginanya ban, kasure ban kanya fag taw.

⁷ Kanya fag takamabo masuksuk nu gleleganan ay namanwan yangay ban masuksuk yakmay e naiyan tagfatawad.

⁸ Ay sanya ginan ban, takamabo fag taw kasure, ay tam Fun Isus ban nu ndasug, gfabul anya siginan at uyup, ay gfamin anya siginan at fagmasineun.

⁹ Kanya fag takamabo kadasug ban, e fagmabalyananun siginans Satanas. Ay kanya namakamulun fagayu nusnge wain at mabalyanan ay tagfandaya fag ngay fakatoglagan, ay at madulo fag ngay fakamulun.

¹⁰ Ay kanya ban nanfamuag sas nusnga setaw fag balyawvtan sas fagayu taw tagafaurianan ban, at yud kaylat gfaning at matuyan laman kalangfe.

¹¹ Ay nu katanya, Dius gfabayan kafag ngay taw nu gadayan laman gafanud sa kafag taw at fakamuaganun,

¹² laman fagayu at yud gafanud sat matuyan, umfaurianan. Kanya fagayu, abat ngate gafanud sat matuyan, guseganan way sat mauri.

Dius Nafili Ayu laman Umlangfe Am

¹³ Em ngay faduksay tam Fun at fakesugun, guseganan ami gugat sas Dius aroro sa ayu. Guseganan ami aroro siginans fakasigadan Dius nafili wan ayu laman gfalangfe, aroro Dius at Masine fag Falad at fagmabalyananun nafasine ayu laman diam e malong ay laman gafanud tuam sat matuyan.

¹⁴ Katanya tam Dius at fagnauroun ayu siginan at Masine fag Barita em nafoyung ayu, laman e afud tuam sa tam Fun Isus at fagmasineun.

¹⁵ Nu katanya, em ngay faduksay, bakvdi tua gugat em ngay foyungan, dewa sis longan ay sis rirukan.

¹⁶ Tam Fun Isus ay anggan tam Dius tam Mama takesug antam, nafon antam at yud e fakatabuan fag fagmasunun ay fag fagsegun siginan at fagmagalangun,

¹⁷ kanya nangus tagfasun ay tagfaksvn ay amatanganan laman fagayu ay fakamulun ay ay longan masine tua.