Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Samwel 9 - Fanawbuid tagsibaliwas Fakayabian


Dabid ay Mefibuset

1 Sik menit, Dabid nainto te, “O e sawad yay manga Saul at kasugfunanan laman namalag au ku fakafanyun kata ku nafatuyanan sa ku fagadgalangan Yunatan?”

2 Fun Dabid nafauro sik taw at ngayan Siba, kanya sik fagsuguan ay siginan Saul at kasugfunanan. Ay kanya nu ndasug, fun Dabid nainto anya te, “O wo wan Siba?” Ay kanya nabalus te, “Sabv, au wan.”

3 Ay fun Dabid gfataglayun ginto anya te, “O Saul manga e kasugfunanan yay laman namalag au sa anya Dius at fakesugun?” Ay kanya nabalus te, “Sabv yay, Yunatan ya at baguama at yud malao.”

4 Fun Dabid gdog yay nainto te, “Ay dada wan kanya?” Ay Siba nabalus te, “Sayay at furuan Lu-Debar, sis Makir, Amyel at baguama, at bale.”

5 Nu katanya, Dabid nasugu at fagsuguan laman namablang Mefibuset sas Makir at bale.

6 Kanya fag baguama at ngayan Mefibuset, Yunatan at baguama ay Saul at fufu. Ay Mefibuset nu ndasug sas Dabid, narungan laman gfalag te, gfababaun. Ay Dabid nalong sa anya te, “O wo wan Mefibuset?” Ay kanya nabalus te, “Sabv, au wan.”

7 Ay Dabid nalong anya te, “Lag o kalimu. Nafauro au emu laman namalag au sa emu ku fakafanyun kata ku nafatuyanan sa ku fagadgalangan Yunatan. Ay katsi, namagbilug kwan sa emu ku nabul am fufuama Saul at daga, ay bundi lang kanya, siginan ro katsi, ste wan nu gfangon o gfasfuan angku.”

8 Nu katanya, Mefibuset natudan nafababaun ay nalong te, “Sinu au laman gfon o sa angku takatanya fag ngay famonun? Au kata kway sik idu at mabulan.”

9 Ay fun Dabid nafauro Siba, ebi Saul at fagsuguan, ay nalong te, “Gfon kwan sas Mefibuset, sam tagfayafun Saul at fufu, at ngay ramraman.

10 Ay get au sa emu ay sam ngay sisian anggan sam ngay fagsuguan te, fakamuluni ban sis Mefibuset at daga laman sa anya. Ay bubai ban sat bale ay gutluan laman ban at ngay kalongan e fakonun tua. Dewa katanya, Mefibuset ban ste way gugat si angku laman ku fasfuan gfangon.” (Siba at baguama labi lima, ay at fagsuguan duak safulu.)

11 Ay Siba nabalus fun Dabid te, “Mesug fag fun, namakamulun kban fagayu am suguan sa angku.” Ay siginan ginanya fag menit, Mefibuset ay Dabid gasfuan gugat gfangon kata nu talame.

12 Ay Mefibuset e munama yay at ngayan Mikas. Ay Siba at ngay kalongan Mefibuset at ngay fagsuguan.

13 Mefibuset wa malao ay gbanwan sis Erusalem ay kanya gfasfuan gugat fun Dabid gfangon.

Copyright © 2021 by OMF International, Philippines 

OMF International
ကြှနျုပျတို့နောကျလိုကျပါ:



ကြော်ငြာတွေ