2 Samwel 8 - Fanawbuid tagsibaliwas Fakayabian

Fun Dabid at ngay Nababo

¹ Abandi, Dabid nababo ngay taw Filistia ay nagbilug Meteg-Ama, kanya fag ngay taw at furuan at sadi.

² Ay Dabid nababo yangay ngay taw Muab. Kanya nafataygilidan kafag ngay taw ay mafataladan sis daga, ay nafasud siginan sik famasud fag lubyang. Ay fagayu at kintap sit fasadi ay at faduak famasud, gfabul wan. Ay at kintap sit fatuluk famasud, wa gfabul. Ay at yud nafabul fag ngay taw Muab, ansadi sas Dabid ay nafon yay sik famayad.

³ Ay Dabid nafawayan yangay Adadeser, talun Suba at fun, Rekub at baguama. Ginanya, fun Adadeser glao laman nangagbilug nusnge wain at munakbang sis Liskung Eufrates.

⁴ Dabid ay at ngay tagfawayan naago fun Adadeser at faguyudan sadik libu, ay fituk libuk tagsaful gsakay sis faguyudan, ay duak safuluk libuk tagfawayan. Dabid ay at ngay tagfawayan nafaalbi ngay kabayu tagguyudan ngay faguyudan, ay nafasawad yay sadik sandank kabayu laman at sakayan.

⁵ Ngay taw Aram nu ndasug siginans Damasku laman nanggubuk fun Adadeser, Dabid ay at ngay tagfawayan nafabul duak safulu e duak libuk tagfawayan.

⁶ Ay Dabid nafawat at fagmafulan sis Damasku, si sangay taw Aram at fagbanwanan. Ay Dabid nagbilug wan kafag furuan, ay sanya ginan, ngay taw Amur nu gfon at famayad sawas Dabid. Yawi nafababo Dabid sas fagayu at nafawayan.

⁷ Dabid nabul siginans fun Adadeser at ngay fagsuguan at ngay famalabag at mawatan siginans gintu, ay nabuba sas Erusalem.

⁸ Ay kanya nabul yangay ngayuk tansu siginans furuan Betak ay Berutai, fun Adadeser at fagagbilugun.

⁹ Ay Tou, talun Amat at fun nu nadungug te, Dabid nababo fun Adadeser at ngay tagfawayan,

¹⁰ kanya nasugu at baguama Uram sas fun Dabid laman namauseganan anya at nababoan Adadeser. (Siginan ebi, fun Tou ay Adadeser gawayan way.) Ay Uram nabuba sik ngay famonun at mawatan siginans ngay sanbung salapi ay gintu ay tansu.

¹¹ Ay fun Dabid nafon sas Yawi kanya fag ngay fagagbilugun, laman at fanggalangun, kata at nafakamulun sa sangay sanbung salapi ay gintu at naago siginan at nababo fag ngay talun:

¹² Edum, Muab, Amun, Filistia ay Amalek. Ay kanya nafon yangay sas Yawi at ngay nabul siginans Adadeser, Suba at fun, Rekub at baguama.

¹³ Ay Dabid ankugat yay nu sik takadungug siginan nu gfabul labi waluk libuk taw Edum sis datag Barara.

¹⁴ Ay kanya nafawat sik ngay fagmafulan sis fagdaul talun Edum laman sat ngay tagfawayan, ay nafagsuguan fagayu taw Edum. Dewa nday Dabid nu gfawayan, Yawi gfababo tua anya.

Dabid at ngay Fagsuguan

¹⁵ Dabid nafunan fagdaul talun Israel ay nafakamulun at matuyan ay at maylat sas fagayu taw.

¹⁶ Uab, Seruya at baguama, tagfangguna ngay tagfawayan. Ay Eusafat, Akilud at baguama, tagalaga ngay rirukan sit fagfagtainanan.

¹⁷ Ay Saduk, Akitub at baguama, ay Akimelek, Abyatar at baguama, at ngay tagfon fanggalangun, ay Seraya at tagriruk.

¹⁸ Ay Benaya, Euyada at baguama, tagfangguna ngay taw Keret ay ngay taw Pelet. Ay Dabid nafili at ngay baguama laman at tagfalu longan.