2 Samwel 7 - Fanawbuid tagsibaliwas Fakayabian

Yawi at Fatuyanan sas Dabid

¹ Ay fun Dabid nu noli wan sat bale, Yawi nafae fagmanabayanun sat fagfagtainanan; ay at ngay fawayan wa namawayan ya anya.

² Ay Dabid nalong sas Natan fag taglong te, “Damai, nu gbanwan au si tua at masine fag bale at fangawat kayu sidru, dewa katanya, Fagsuadan Dius at Nasadian siway sik bale ramit.”

³ Ay Natan nabalus fun Dabid te, “Fakamuluni nusnga setaw am fakaylatun, aroro Yawi gufud tua emu.”

⁴ Ay ginanya fag yabi, Yawi nalong sas Natan te,

⁵ “Loi wan ay nanlong o sa ku fagsuguan Dabid te, ‘Katatuy Yawi at longan: O namawat ban o sik bale laman ku fagnamanwanan?

⁶ Siginan ebi nu gfaduksun au ngay taw Israel siginans talun Igiptu kya batang gbanwan si sik bale at mogat. Ay dasug katsi gadgalinan kway gugat, ay ku fagbanwanan sik bale ramit.

⁷ Ay kaduge au gadgalinan gasfuan ku ngay taw kya batang glong sa ku nafili fag ngay tagfangguna taw Israel te, “Wain ay fagyudun nawat ku bale at fangawat kayu sidru?” ’

⁸ “Ay longi yangay sas Dabid te, ‘Au Yawi at Mabalyanan, glong au te, Ebi sik tagulit way o ngay tupa, dewa katanya, nafili au emu laman at namangguna ku ngay taw Israel.

⁹ Naufud au emu dewa nday nu glao o ay nafababo au emu sas fagayu am ngay fawayan. Ay katsi namasik takadungug au emu kata tibak taw takadungug sas fagdaul daga.

¹⁰ Nafon au sa ku ngay taw Israel sik talun, laman at sadili fagbanwanan. Ay at mauri fag ngay taw di ban gfasalag ya anya fagayu kata ebi ginan,

¹¹ siginan ngay nu gfili au ngay tagfangguna ku ngay taw Israel. Ay gfae fagmanabayanun kban ayu siginan ay ngay fawayan. Ay au Yawi, gfatuyanan au te, am ngay kasugfunanan at nanfunan ku ngay taw Israel.

¹² Ay nu nbul ban o namoli emu sa am ngay mangaguyang at fagfolian, ku fantubus ban emu am baguama tua at sadi, ay gfaksvn kban at fagfagtainanan.

¹³ Ay kanya ban at namawat ku bale laman sa ku ngayan, ay gtuyan au te, at ngay kasugfunanan tua ban gugat tagfunan kabavn.

¹⁴ Ay kanya ban gtuyan angku te, at mama, ay gtuyan kyangay ban anya te, ku baguama. Ay kanya ban nu nke asalanan, gsalag au anya kata sik mama nu gsalag at sisian.

¹⁵ Dewa katanya, kesug ktua ban gugat anya, ay kdi ban gfakamulun kata ku nafakamulun sas Saul am natubus fag fun.

¹⁶ Am ngay kasugfunanan ban kabavn gfataglayun nu gfunan si ku daga salubangan.’ ”

¹⁷ Nu katanya, Natan nalong sas Dabid Yawi at foyungan fagayu sa anya.

Dabid at Darangin

¹⁸ Sanya ginan, fun Dabid nasakbo sas bale ramit sat fagfasakboan Fagsuadan Nasadian ay namalunggung sanya sis Yawi at daga salubangan ay gdarangin te, “Yawi, ku Fun, sinu au nunda, ay sinu ku ngay kasugfunanan laman sik mauseganan ami sa emu?

¹⁹ Ay katsi nafatuyanan yay o sa ku kasugfunanan ban. O kaksvn tua kanya nu masadi o sa sangay taw?

²⁰ Yawi ku Fun, nataw ya ku fagmalongun sa emu? Aroro natoglag wo angku am fagsuguan.

²¹ Nafakamulun tuo takatanya fag ngay fakamulun at mabalyanan, ay nafasure tuo sa angku, laman sa angku am fagsuguan, kata am fakaylatun.

²² “Yawi ku Fun, o wan at mabalyanan. We gfasud emu, ay we tibak dius sas day emu ay wa yangay mi e fagsafulun tibak dius takata emu.

²³ Ay wa yangay e gfasud am ngay taw Israel. Sas fagdaul daga kanya way lang fag ngay taw am nafalfas siginan nu gafagsuguanan, laman am ngay taw. Ay nafakamulun o at mabalyanan ay at maksvn nu madulo, ay siginan nu ggubuk o am ngay taw laman gaiyan tibak gaban taw, gina o gfalangfe anya fagayu siginans Igiptu.

²⁴ Yawi, nafili o ngay taw Israel laman am ngay taw kabavn ban, ay o wan at Dius.

^25-26 “Yawi, ku Dius, fafasludani am fatuyanan sa angku am fagsuguan ay sa ku kasugfunanan laman ban o tua takadungug kabavn. Ngay taw ban lumong te, ‘Yawi at Mabalyanan, ngay taw Israel at Dius!’ Ay kabavn ban ami fag kasugfunanan gfataglayun ami gfakamulun sa emu.

²⁷ Yawi, taw Israel at Dius at mabalyanan, ku amatanganan mabitsug nu gdarangin au sa emu, aroro nafatuyanan tuo sa angku am fagsuguan te, gfataglayun ban nu gfunan au anggan ku ngay kasugfunanan.

²⁸ Yawi ku Fun, o wan at matuyan fag Dius! Nafatuyanan o sa angku am fagsuguan nusnge wain at masine. Matuyan tua am ngay fatuyanan.

²⁹ Nangus ku ngay kasugfunanan umke fagmasineun tua laman ban si tuami gugat am daga salubangan kabavn, kata am fatuyanan. Yawi, siginan am gubuk emi, fagdaul ku talananan sik mauseganan kabavn ban.”