2 Samwel 6 - Fanawbuid tagsibaliwas Fakayabian

Dabid Nabuba Fagsuadan Nasadian sas Erusalem

¹ Dabid nadog yay nafaful ngay taw Israel at makatu namawayan, ay nu fagayu wan tuluk safuluk libu.

² Ay kanya fagayu nalao sas Baala tagsis talun Uda laman namul Fagsuadan Dius at Nasadian; Yawi gbanwan sanya sis wabilug duak awatan ke fakfak.

^3-4 Ay kanya fagayu nabul Fagsuadan Nasadian siginans Abinadab at bale tagsis buksul ay nafabuba sa sik faguyudan bagu. Abinadab at baguama fagdua, Usa ay Akyu, tagulit kafag faguyudan, ay Akyu tagsis fagunan.

⁵ Ay Dabid ay fagayu taw Israel maksvn nu guseganan sis Yawi at daga salubangan. Ay kanya fagayu galubad ay gfawang ngay fagfawangun ke ngay bakyang, fagfadkalinganun ay fagfadkatukanun.

⁶ Ay kanya fagayu gina andasug sas Nakun at fagruyusan, ngay baka antaid, ay Usa nabakvd wa vtv Fagsuadan Dius at Nasadian.

⁷ Ay Yawi maksvn nu kadotama Usa ay nafabul anya aroro sat nafakamulun, ay Usa nbul sis day Fagsuadan Nasadian.

⁸ Ay Dabid andotama aroro Yawi nafabul Usa, ay dasug katsi, nafangayan kafag talun te, Peres-Usa.

⁹ Ay ginanya fag menit, Dabid anlimu Yawi, ay nalong te, “Tain ro nu mafadasug au Fagsuadan Nasadian sa ku furuan?”

¹⁰ Ay Dabid wa naylat gbuba Yawi at Fagsuadan Nasadian sat furuan, abat ngate, nafamato way sis Ubed-Edum fag taw Gat at bale.

¹¹ Ay kaduge tuluk magdanun, Fagsuadan Nasadian si yays Ubed-Edum at bale, ay Yawi nafayu Ubed-Edum fag talanan at ramraman.

¹² Ay fun Dabid nasaful te, Yawi nafayu Ubed-Edum fag talanan at ramraman aroro galaga Fagsuadan Nasadian. Nu katanya, Dabid nalao sas Ubed-Edum at bale laman namul Fagsuadan Dius at Nasadian. Ay kanya guseganan gbuba sat furuan.

¹³ Tagbuba Fagsuadan Yawi at Nasadian nu nasiklang unum, Dabid nalong sa anya fagayu te, “Karagang yap tam.” Ay kanya fagayu nafon sas Yawi at ngay fanggalangun, sik baka tama, ay sik tumad baka at mafatagluan.

¹⁴ Dabid nasulun sik mafilian fag lanbung at fangawat at masine fag ramit, kata tagfon fanggalangun at lanbung, ay guseganan gfalelegan at afud bilug sis Yawi at daga salubangan.

¹⁵ Ay Dabid ay ngay taw Israel guro guseganan gbuba Fagsuadan Yawi at Nasadian, ay gfawang ngay budyung.

¹⁶ Ay tagbuba Fagsuadan Yawi at Nasadian gina gsakbo sas Dabid at furuan, Mikal, Saul at baguina, gbanawan sis fagbanawanan. Ay nu nalag fun Dabid nu gfalelegan at ngay afud bilug sis Yawi at daga salubangan, kanya ankuri.

¹⁷ Ay kanya fagayu nafasakbo Fagsuadan Yawi at Nasadian sas Dabid at nafawat fag bale ramit, ay nafon sas Yawi at fagirugun fag ngay fanggalangun ay anggan ngay fanggalangun laman sas fagmanabayanun.

¹⁸ Ay Dabid nu ntabu gfon at ngay fanggalangun, kanya nafadante ngay taw sas Yawi at Mabalyanan at ngayan.

¹⁹ Ay kanya nafon tinapay, yamas ay pasas sa sangay taw Israel, mangama man ay mangena. Sanya ginan kanya fag ngay taw noli wan sat mesa bale.

²⁰ Ay Dabid noli laman namadante at talnayan, ay Mikal, Saul at baguina, nafablang anya ay nafalingun te, “Katsi fag menit mafanud laman sa sangay taw Israel at fagsuyuun fia fag fun! Gfalelegan o am ngay afud bilug sim ngay fagsuguan fag mangena at daga salubangan kata nu malulasan, ay wo napla ya!”

²¹ Ay Dabid nabalus Mikal te, “Nafakamulun au takatanya sas Yawi at daga salubangan aroro kanya nafili angku laman fantubus am mama, mannga nu sinu at sadi at kasugfunanan. Yawi nafili angku laman nanfunan ngay taw Israel. Nu katanya, gfataglayun au gfauseganan Yawi sat daga salubangan.

²² Dewa ku fakamulun mapla, nu sa tua tagfauseganan Yawi, gfataglayun au gfakamulun. Nu sa emu maksvn nu mapla ku nafakamulun, dewa katanya, sa ku ngay fagsuguan fag mangena maksvn nu mauseganan au.”

²³ Siginan takatanya, Mikal wa nasisian anggan anbul.